כ"ק אדמו"ר מתולדות אברהם יצחק שליט"א וועלכער האט געוויילט די לעצטע דריי וואכן אין ניו יארק לטובת די מגבית באהבה וברצון אויפצובויען די נייע גרויסע ביהמ"ד אין ירושלים, וועט היינט נאכמיטאג אנקומען אויף א בליץ באזוך בקרב חסידיו אין שטאט בארא פארק, אויפן וועג צום לופטפעלד פון וואו דער רבי וועט זיך הייבן מיט א פריוואטע פליגער אונטערוועגנס צוריק קיין ארץ ישראל.
די געהויבענע באזוך פונעם רבי'ן אין ניו יארק איז ב"ה געקרוינט געווארן מיט גרויס הצלחה, ווען עס איז אפגעראכטן געווארן די מאסיווע קאמפיין באהבה וברצון, וואו עס איז אויפגעטריבן געווארן אריבער זעקס מיליאן דאללער לטובת די אויפבוי פון די נייע ביהמ"ד דחסידי תולדות אברהם יצחק אין ירושלים. די חסידים אין אמעריקע האבן געהאט די זכיה זיך מסתופף צו זיין בצילא דמהימנותא פאר דריי לעכטיגע שבתים, דריי לעבעדיגע וואכן מיט תפילות און מעמדים, און זיך קלאמערן ארום דעם רבי'ן אין די וואודבארי דזשאנקשען געגנט אין קרית יואל.
נעכטן זונטאג איז פארגעקומען די שמחת החתונה פון א אייניקל ביים רבי'ן שליט"א, די חתן א זון פון זיין איידעם הגה"צ ר' ארי' לייבוש טייטלבוים זצ"ל הי"ד, זון פון הגה"צ גאב"ד וואלאווע שליט"א, מיט די כלה א טאכטער פון הגה"צ ר' נתן דוד אשכנזי שליט"א, זון פון כ"ק אדמו"ר מסטאניסלאוו לאנדאן זצ"ל, און איידעם ביי הגה"צ ר' מנחם סעקולא שליט"א אבד"ק נחלת ישראל סאדאוונא. די חתונה איז פארגעקומען אין תפארת עלקא זאל אין מאנסי, וואו דער רבי האט באשיינט על ראש שמחתו, און אפגעראכטן די ריקודין קדישין לפני הכלה בעוז ותעצומות.
היינט מאנטאג וועט דער רבי אנקומען קיין בארא פארק, צו באשיינען די מעמד חנוכת הבית וקביעת מזוזה פאר די נייע ביהמ"ד דחסידי תולדות אברהם יצחק, אינאיינעם מיט די מעמד הנחת אבן הפינה פאר די נייע שלב אינעם בוי ארבעט צו פולקאם פארענדיגן די נייע בית המדרש לשם ולתפארת.
נאך תפילת מעריב וועט דער רבי ארויספארן פון בארא פארק גראד צום לופטפעלד, פון וואו דער רבי וועט זיך הייבן מיט א פריוואטע פליגער אונטערוועגנס צוריק קיין ארץ ישראל באגלייט מיט ברכות וישועות פון כל הקהל הקודש.
