נעכטן מוצאי שבת קודש ביי א מלוה מלכה אין ביהמ"ד תולדות אברהם יצחק אין די רמה ד' געגנט אין בית שמש, האט כ"ק אדמו"ר מתולדות אברהם יצחק שליט"א אויפגעטרעטן מיט דברות קודש דורך א לייוו הוקאפ, און דערביי געמאלדן איבערראשנדע נייעס אז ער שטעלט זיין זון הגה"צ ר' יואל קאהן שליט"א אלס רב פון די קהילה, אשר יצא לפניהם ואשר יבוא לפניהם, צו שטיין אין שפיץ פון די שיינע בליענדע קהילה דחסידי תולדות אברהם יצחק אין די רמה ד' געגנט, וואס ציילט זיך שוין היינט אריבער זעכציג משפחות בליעה"ר.
הגה"צ ר' יואל קאהן שליט"א וועלכער איז דעם רבינ'ס פיפטע זון, און איז די לעצטערע יארן געשטאנען אין שפיץ פון די קהילה אין לאנדאן, האט דעם שבת פרשת שמות געוויילט בקרב הקהילה אין רמה ד', מוצאי שבת איז פארגעקומען א סעודת מלוה מלכה אינאיינעם מיט די חברי הקהילה, און אין א איבערראשנדע שריט האט דער רבי שליט"א געמאלדן מוצאי שבת אז ער וויל זיין זון הגה"צ ר' יואל זאל איבערנעמען די הנהגת העדה אין רמה ד', וואו ער וועט אי"ה אויפבויען א שיינע גרויסע בית המדרש לשם ולתפארת.
