מיט גרויס שמחה איז באקאנט געווארן די נייעס איבער הרחבת גבולי הקדושה בחצר הקודש ווערדאן, ווען אין א מזל'דיגע שעה איז די הנהלת הקהילה אריינגעשפרינגען אין א פראיעקט אפצוקויפן א פרישן שטח אין הארץ פון שטאט בארא פארק, לכונן את בית השם און פארברייטערן דעם הייליגן מקום תורה ותפילה ק"ק קדושת יוסף ווערדאן, לשמו ולזכרו פון כ"ק אדמו"ר הרה"ק מווערדאן זצ"ל וועמענס יארצייט עס געפאלט אין די טעג.
די קהילה קדושה קהל קדושת יוסף ווערדאן געפונט זיך אויף די פיר און פופציגסטע סטריט, צווישן די זעכצנטע און די זיבעצנסטע עוועניוס, עס איז אויסגעשטיגן אלס א ווארעמע חסידישע צענטער לתורה ולתפילה, וואו אידישע קינדער דערווארעמען זיך באורו הבהיר פון כ"ק אדמו"ר מווערדאן שליט"א, על ישראל הדרתו אינעם עיר ואם בישראל בארא פארק, וועלכער איז ממשיך דעם שיינעם הנהגה פון אביו הגדול דער רבי הרה"ק מווערדאן זצ"ל.
אצינד ווען עס האט זיך אנגעזעהן די נויט צו פארברייטערן די גבולי הקדושה, איז די הנהלת הקהילה אריין אין א פראיעקט און אפגעקויפט א גרויסע שטח מיט א בנין דערויף, אויף די פופצנטע עוועניו ביי די פיר און פופציגסטע סטריט, וואו עס וועט בקרוב הימים ווערן אויפגעבויעט א פראכטפולע בית המדרש לתורה ולתפילה, מיט א תפילה בורא עולם בקנין השלם זה הבנין.
די פרייליכע נייעס איז געמאלדן געווארן ביים סעודת הילולא וסעודת מצוה לגומרה של תורה, לכבוד די הכנסת ספר תורה בחצר הקודש ווערדאן וואס איז פארגעקומען די וואך. לויט די פלענער וועט די נייע בנין ביהמ"ד ערהאלטן א שיינע לופטיגע היכל ביהמ"ד, שטיבלעך צום דאווענען, א היכל התורה, א שיינע מהודר'דיגע מקוה, א אוצר הספרים, און א פריוואטע צימער פארן רבי'ן שליט"א צו משפיע זיין תורה וחסידות פאר קהל עדת צאן מרעיתו.
