יעצט דאנערשטאג נאכמיטאג איז כ"ק אדמו"ר מסקולען שליט"א אריינגענומען געווארן אין אפעראציע צימער אין די קארנעל שפיטאל, וואו דער רבי גייט אדורך א פראצעדור ארויפצושטעלן א טרעיק, וואס וועט מיטן אויבערשטנס הילף פארגרינגערן דעם רבינ'ס אטעם, און אזוי צוהעלפן אפצושלאגן די שווערע קאמפליקאציעס וואס האבן זיך געמאכט אין די לעצטע פאר וואכן.
די דאזיגע שריט איז א שטיקל ליכטיגקייט אינעם רבינ'ס שווערע דורכגאנג, ווען די שאנסן זיך צו ערהוילן טוט עטוואס שטייגן, אבער פון די אנדערע זייט באדייט עס א שווערע מחזה פאר חסידי סקולען, אז דער רבי וועט נישט קענען געהעריג אנגיין מיט די עבודת הקודש ווי געווענליך זייענדיג צוגעבינדן צו מאשינען, אויף וואס אידישע קינדער וועלן ווייטער מתפלל זיין דער רבי זאל זיך גענצליך ערהוילן, און קענען אראפגיין פון די מאשינען ווי אמשנעלסטן.
אין די זעלבע צייט ווערט געמאלדן מטעם חצרות הקודש סקולען, שטייענדיג בלויז דריי טעג אפגערוקט פון די יומא טבא לרבנן, די יום הצלה והשחרור פון אדמור"י בית סקולען מגיא צלמות פון די קאמוניסטישע רעזשים מיט פינף און זעכציג יאר צוריק, אז אנדערש ווי יעדעס יאר ווען די פייערליכע חגיגה סעודת הודאה און מלוה מלכה ווערט געפראוועט ברוב עם הדרת מלך דורך אלע ברידער אינאיינעם אין שפיץ פונעם עלטסטן ברודער כ"ק אדמו"ר מסקולען שליט"א, אשר אף הוא היה באותו הנס, וועט די מעמד דאס יאר געפראוועט ווערן אין יעדע שטאט באזונדער, מיטן אפוועזנהייט פונעם עלטסטן ברודער דער רבי שליט"א וועלכער געפונט זיך ליידער על ערש דוי.
כ"ק אדמו"ר מסקולען וויליאמסבורג שליט"א וועלכער וועט פראווענען שבת אין קרית יטב לב אין בלומינגבורג, וועט פראווענען די סעודת הודאה און מלוה מלכה אין זאל עטרת פעסיל לאה בבנין המוסדות.
כ"ק אדמו"ר מסקולען מאנסי שליט"א וועט פראווענען די סעודת הודאה און מלוה מלכה בבית מדרשו קהל נועם אליעזר סקולען אין מאנסי.
כ"ק אדמו"ר מסקולען לעיקוואד שליט"א וועט פראווענען די סעודת הודאה און מלוה מלכה בבית מדרשו אין לעיקוואד.
און כ"ק אדמו"ר מסקולען ירושלים שליט"א וועט פראווענען די סעודת הודאה און מלוה מלכה אינעם גרויסן אודיטוריום אויף רחוב מנחת יצחק אין ירושלים.
בשעת די געהויבענע מעמדים, נאך חצות הלילה מוצאי שבת, וועט מען אינאיינעם מיט א כח הרבים מתפלל זיין און זאגן תהלים לרפואתו השלימה פון כ"ק אדמו"ר מסקולען שליט"א, יתחדש כנשר נעוריו בבריות גופא ונהורא מעליא, כ"ק מרן רבי ישעי' יעקב בן רייזל לרפואה שלימה.
