פרייטאג כי תבוא אינדערפרי
צוליב פארשידענע פראבלעמען וואס איז אונטערגעקומען אנבאלאנגט די באשטימטע שטח אין ניו דזשערזי, אריינגערעכנט די שווערע מלחמה צושטאנד אין ארץ ישראל וואס שטעלט גאר שווער צו פארזיכערן אזא ריזן ציבור אויף איין ארט, איז אויף דערווייל די גרויסע עצרת געווארן אפגעשטופט, אן קיין פונקטליכע דאטום און פלאץ וואו עס וועט פארקומען.
דינסטאג כי תבוא ביינאכט
א געמיינזאמער קול קורא ערשיינט יעצט אונטערגעשריבן דורך מערערע אדמורי"ם רבנים און ראשי ישיבות פון איבער גרעיטער ניו יארק און ניו דזשערזי, וואו די גדולי הדור רופן דעם ציבור זיך צוזאמצוקומען און לאזן הערן א קול מחאה וצעקה אויף א פאראייניגטע פארנעם.
דאנערשטאג פרשת ראה 11:15 ביינאכט
יעצט ביינאכט ביים צענטראלן יארצייט טיש אין ביהמ"ד הגדול אין קרית יואל, האט כ"ק אדמו"ר מסאטמאר שליט"א אדרעסירט די שרעקליכע גזירת הגיוס וואס הויערט אויף אחינו בני ישראל בארץ הקודש, דער רבי האט אויסגעשריגן מנהמת לבו די חוב קדוש וואס ליגט אויף די אמעריקאנע אידנטום ארויסצוקומען לרחובה של עיר און מיט א פאראייניגטע שטימונג אפשרייען די שרעקליכע גזירה.
דער רבי האט אויסגערופן אז דעם קומענדיגן זונטאג נצבים וילך וועט פארקומען א ריזן עצרת תפילה במקהלות אלפי ישראל, און אלע זאלן זיך משתתף זיין ביים כנסיה לשם שמים, וואו מיט דעם כח הרבים וועט מען אויספועל'ן א ישועה כללית פאר כלל ישראל.
*
דאנערשטאג פרשת ראה 11:00 ביינאכט
יעצט ביינאכט ביים צענטראלן יארצייט טיש אין די נייע היכל הגדול בבנין ביהמ"ד בנין אליהו סאטמאר אין קרית יואל, האט כ"ק אדמו"ר מסאטמאר שליט"א געמאלדן בשער בת רבים איבער די ריזן עצרת תפילה ומחאה וואס וועט פארקומען דעם קומענדיגן זונטאג פרשת נצבים וילך ברחובות העיר ניו יארק, און דערביי אויפגעפאדערט פון אלע תלמידים וחסידים צו זיין א טייל פון די כנסיה לשם שמים, און זיך פאראייניגן לדורון לתפילה ולמלחמה קעגן די שרעקליכע גזירת הגיוס בארץ הקודש.
*
דאנערשטאג פרשת ראה 1:30 נאכמיטאג
דאס יהדות החרדית אין ניו יארק קאכט ווי א קעסל איבער די פארברייטערטע גזירת הגיוס וואס הויערט אויף אחינו בני ישראל בארץ הקודש, אסאך איז שוין געטון געווארן דערוועגן, לדורון ולמלחמה, שווערע מיליאנען איז שוין אויפגעטריבן געווארן צו פינאנצירן די ישיבות און כוללים וואס האבן פארלוירן שטיצע אין רעזולטאט פון די פרישע גזירה, און אצינד גרייט מען זיך צו א פרישע טריט צו באקעמפן די גזירה.
צענדליגע טויזענטער אידן זענען ערווארטעט ארויסצוקומען ברחובה של עיר אין א פאראייניגטע שטימונג, מתפלל זיין און מעורר זיין רחמי שמים, אויסשרייען דעם קול מחאה און קול תפילה במקהלות רבבות עמך בית ישראל, אין שפיץ פון די ראשי העדה, שרי התורה, אדמורי"ם רבנים וראשי ישיבות, מרביצי תורה תלמידי חכמים ומנהיגי ישראל פון אלע שיכטן און קרייזן.
די היסטארישע עצרת תפילה ומחאה ווערט געפלאנט אויף דעם קומענדיגן זונטאג פרשת נצבים וילך י"ט אלול, און איז ערווארטעט צוזאמצוברענגען א זעלטן קאלירפולע ציבור פון נאנט און ווייט, עס ווערט באשטעטיגט דורך ביידע סאטמארע קהילות צוגלייך, ועל צבאם מרנן ורבנן גדולי הדור, אצינד ווערן געמאכט העפטיגע באראטונגען דורך די עסקנים פון כמעט אלע גרעסערע קהילות פון איבער גרעיטער ניו יארק און ניו דזשערזי, צו פארזיכערן די מאקסימום הצלחה און קול תפילה וואס זאל אפקלינגען איבער די וועלט מסוף העולם ועד סופו.
