זונטאג 6:05 נאכמיטאג
די קינדער פונעם רבי'ן זצ"ל זאגן יעצט קדיש ביים פרישן קבר פונעם רבי'ן זצ"ל.
***
זונטאג 5:50 נאכמיטאג
אצינד איז פארענדיגט געווארן סתימת הגולל, שם חלקת מחוקק ספון, מען זאגט צידוק הדין און אין די נאנטע מינוטן וועלן די אבלים ארויסקומען צווישן די שורות.
***
זונטאג 5:10 נאכמיטאג
די מיטה פון הרה"ק מסקולען זי"ע ווערט אצינד אריינגעברענגט אויפן סקולענער חלקה, צוליב די שרעקליכע געדרענג גייט אלעס גאר שטייט, און מען האפט אנצוהייבן די קבורה אין די קומענדיגע מינוטן.
אויפן פלאץ זעהט זיך אן כ"ק אדמו"ר מפאפא שליט"א א שוואגער מיטן רבי'ן זצ"ל, כ"ק האדמורי"ם מוויזניץ פון מאנסי, סקווירא מאנסי, טעמעשוואר קרית יואל, ראה"כ זכרון מנחם, גאב"ד גרינוויל, אב"ד קהל אברכים, אב"ד אור נפתלי, און הגה"צ ראב"ד סקווירא שליט"א.
***
***
זונטאג 4:08 נאכמיטאג
די מיטה איז נארוואס אנגעקומען פארנט פון סקולענער בית המדרש אין מאנסי, וואו עס זענען פארזאמלט א ריזן ציבור אידן אין שפיץ פון אדמורי"ם ורבנים, אצינד טוט מען ווייטער באגלייטן ארויף די גאס אין ריכטונג פון בית החיים.
צווישן די באטייליגטע זעהט זיך אן כ"ק אדמו"ר מסאטמאר שליט"א, און האדמורי"ם משינאווא און זידטשויב פרעמיסלא שליט"א.
***
זונטאג 3:35 נאכמיטאג
עטליכע מינוט צוריק איז די מיטה אנגעקומען ביים פארק ענד רייד אויף די רוט 59 אין מאנסי, הגה"צ ר' יוסף ישראל אייזענבערגער שליט"א דומ"ץ שיכון סקווירא האט געזאגט קל מלא רחמים, און דערנאך האבן די אנוועזנדע באגלייט א שטיק וועג, ווען בראש המלווים זעהט זיך אן כ"ק האדמורי"ם מסקווירא, זוועהיל ארה"ב, טאלנא פון אשדוד, און ראצפערט שליט"א.
***
זונטאג 3:15 נאכמיטאג
אין די קומענדיגע מינוטן איז די מיטה ערווארטעט אנצוקומען קיין מאנסי, באלד ביים אראפקומען פון די הייוועי וועט מען זיך אפשטעלן ביי די פארק ענד רייד ביי עקזיט 14, נעבן ספרינג וואלי מארקעט פלעיס, כ"ק אדמו"ר מסקווירא שליט"א געפונט זיך דארט ביים פארק ענד רייד און ווארט אפ די מיטה, אינאיינעם מיט הונדערטער חסידים פון נאנט און ווייט.
***
זונטאג 2:15 נאכמיטאג
צענדליגע טויזענטער אידן קערן זיך צוריק אצינד נאכן באגלייטן דעם צדיק נשגב בדרכו האחרונה, אין די צייט וואס טויזענטער אידן מאכן זייער וועג קיין מאנסי צו זיין אנוועזנד באשכבתיה דרבי, צוערשט ביים מסע הלוויה פארנט פון סקולענער בית המדרש אויף בלובערי הילל, און דערנאך דעם לאנגן וועג ביז צום וויזניצע בית החיים אויף רוט 306.
צווישן די מלווים האט זיך אנגעזעהן מערערע אדמורי"ם ורבנים, כ"ק האדמורי"ם מסאטמאר, באבוב, באבוב 45, פאפא, מונקאטש, דינוב, טשערנאביל, וויזניץ פון וומס"ב, ירושלים, און בארא פארק, סערדאהעלי, סקווירא פון ב"פ, קאשוי, סקאליע, קאליש, קאסוב, ליסקא, דעעש, דומ"ץ באבוב, אבד"ק באבוב 45, און נאך חשובע רבנים אדמורי"ם, ראשי ישיבות און בנן של קדושים.
***
זונטאג 1:40 נאכמיטאג
נאכן פארענדיגן די הספדים איז פארגעזאגט געווארן קל מלא רחמים בקול בוכים, דערנאך האט מען געזאגט קאפיטל נ"א פסוק בפסוק, פארגעזאגט דורכ'ן רבינ'ס פעטער הגה"צ ר' מאיר שטערן שליט"א אב"ד גבעת שאול, און דערנאךהאבן די קינדער און די ברידער כ"ק מרנן האדמורי"ם שליט"א געריסן קריעה.
די בארא פארקער גאסן זענען שווארץ פון צענדליגע טויזענטער אידן וואס באגלייטן די מיטה, אנדערש ווי געמאלדן באגלייט מען אראפ צו די עלפטע עוועניו, און פון דארט ביז די זעכציגסטע סטריט אויפן וועג קיין מאנסי.
***
זונטאג 1:05 נאכמיטאג
הגה"צ ר' שמעון יואל וויינבערגער שליט"א גאב"ד וויטקא טרעט אויף אצינד מיט דברי הספד לפני מיטתו פון זיין גרויסן שוואגער דער רבי זצ"ל. מען האט אויסגערופן אז דאס איז די לעצטע הספד, און תיכף דערנאך זאל מען אנהייבן ארויסגיין אויף די גאס צו פארמיידן סכנת נפשות.
אומבאשרייבליכע בכיות הערט זיך בין כותלי בית המדרש, אין צוגאב צו יאמערליכע געוויינען אינדרויסן פון ביהמ"ד, נפלה עטרת ראשינו!
***
זונטאג כי תצא 12:50
הימל שפאלטענדע בכיות הערט זיך בין כותלי בית המדרש, צוערשט האט מען אפגעראכטן די הקפות כנהוג, און דערנאך האט אויפגעטרעטן מיט דברי הספד בנו הגדול פונעם רבי'ן זצ"ל הרה"צ ר' אהרן מאיר פארטוגאל שליט"א, וועלכער האט ארויסגעברענגט די הייליגע עבודה פון אביו הגדול דער רבי זצ"ל, זיין שמירה יתירה אין יעדע ריר, זיין קשר צום הייליגן זיידן הרה"ק בעל נועם אליעזר זי"ע, זיין מלחמת קודש קעגן די נסיונות הדור, און די געוואלדיגע מסירת נפש פון מחברתו הטהורה הרבנית הצדיקת תליט"א.
דערנאך האט אויפגעטרעטן חתנו הגדול הגה"צ ר' מרדכי דוב בעק שליט"א אבד"ק טאלמיטש מיט דברי הספד, און דערמאנט איבער זיין כח האמונה און דביקות צום בורא כל עולמים.
אצינד טרעט אויף מיט דברי הספד דעם רבינ'ס זון הרה"צ ר' אליעזר זוסיא פארטוגאל שליט"א.
***
זונטאג כי תצא 12:00 מיטאג
אין די לעצטע פאר שעה איז פארגעקומען העפטיגע צוגרייטונגען אויפן וויזניצע בית החיים אין מאנסי, וואו מען האט צונומען די געביידע וואס איז געשטאנען הארט נעבן מקום מנוחת הקודש פון הרה"ק בעל נועם אליעזר מסקולען זי"ע, באותו מקום וואו אידישע קינדער האבן מתפלל געווען פאר צענדליגע יארן, און איז נתקדש געווארן בקדושה של מעלה. דארט אויפן פלאץ וועט דער רבי קומען למנוחת עולמים, נעבן זיין גרויסן זיידן הרה"ק בעל נועם אליעזר זי"ע.
***
***
זונטאג כי תצא 11:00 פארמיטאג
דרכי בארא פארק אבילות
די שטאט בארא פארק וויינט און קלאגט על סילוקו של צדיק, עס זאגט זיך שווער די ברכה "ברוך דיין האמת", ווען מ'איז מברך על הרעה, די שרעקליכע טראגעדיע וואס האט באטראפן די גאנצע שטאט און די חסידישע וועלט בפרט, צער און טרויער הערט זיך פון אלע זייטן, אין די צייט וואס די לעצטע הכנות צום גרויסן לוויה ווערן געמאכט דורך טעטיגע עסקנים פון איבעראל.
ארום האלב נאך ניין איז די מיטה ארויסגענומען געווארן פון ביהמ"ד, צו דורכפירן די טהרה אין די מקוה בבנין ביהמ"ד סקולען, אדערווייל גרייט מען צו די היכל ביהמ"ד צו די גרויסע לוויה, וואו עס וועלן בלויז אריינגעלאזט ווערן די נאנטע בני המשפחה אדמורי"ם און רבנים.
פארנט פון ביהמ"ד איז פארהאן א שטארקע פאליצייאישע אנוועזנהייט, ווי אויך אויף די ארומיגע גאסן צו האלטן ארדענונג, שווערע טויזענטער אידן זענען ערווארטעט ארויסצוקומען ברחובה של עיר לחלוק כבוד האחרון פארן צדיק נשגב, און זיך געזעגענען פון דעם געטרייען און באליבטן מנהיג אויף וועם אלע האבן איינגעריסן וועלטן.
לויט די יעצטיגע פלאן, וועט מען ארויסברענגען די מיטה נאך די הספדים אין ריכטונג פון די פערצנטע עוועניו, און ווי די עסקנים בעטן זאל די ציבור שטיין צושפרייט לענגאויס די פיר און פופציגסטע סטריט און לענגאויס די פערצנטע עוועניו, אין ריכטונג פון די העכערע גאסן וואו מען וועט באגלייטן די מיטה ביז די זעכציגסטע סטריט.
אנקומענדיג קיין מאנסי וועט די לוויה אריבערגיין פארנט פון ביהמ"ד קהל נועם אליעזר סקולען אויף בלובערי הילל, און פון דארט וועט מען באגלייטן דעם גאנצן וועג אויף רוט 306 ביז די וויזניצע בית החיים.
שם חלקת מחוקק ספון, די מקום הקבורה איז שוין צוגעגרייט הארט נעבן מקום מנוחת קדשו פון זיין גרויסן זיידן הרה"ק בעל נועם אליעזר זי"ע, אויפן אנדערן זייט פון זיין גרויסן פאטער הרה"ק בעל מאור ישראל זי"ע. דארט אויפן פלאץ וואו עס איז ביז עטליכע שעה צוריק געשטאנען די באקאנטע שטיבעלע וואו אידישע קינדער זענען מתפלל אויף דעם אדמת קודש שוין צענדליגע יארן להיוושע בכל מילי דמיטב.
***
***
***
מוצאי שבת קודש 2:10
אין די יעצטיגע מינוטן ווערט די מיטה פון הרה"ק מסקולען זצ"ל אריינגעברענגט אין בית המדרש, הונדערטער אידן געפונען זיך אויפן ארט און וויינען בבכיות נוראות, דורכאויס די נאכט וועט מען זאגן תהלים ארום די מיטה, ביז אינדערפרי ווען מען וועט אפרעכטן די טהרה כנהוג.
***
עסקנים און חברים ד'ראקלענד ביים צוגרייטן דעם מקום הקבורה אויפן בית החיים אין מאנסי
***
***
מוצאי שבת קודש 1:20
די מיטה פון הרה"ק מסקולען זצ"ל איז אין די יעצטיגע מינוטן אדורכגעפארן פארנט פון ביהמ"ד קהל נצח ישראל סקולען אין וויליאמסבורג, דארט וואו דער רבי האט פאר לאנגע יארן אפגעראכטן די עבודת הקודש, סיי אין די פריערדיגע יארן בצל הקודש פונעם טאטן און זיידן, און סיי אין די שפעטערע יארן אלס רבי ומנהיג הקהילה. פילע אידן האבן זיך פארזאמלט אפצוגעבן דעם כבוד האחרון און באגלייט א שטיק וועג.
***
מוצאי שבת קודש 12:45
די מיטה פון כ"ק אדמו"ר הרה"ק מסקולען זי"ע איז נארוואס ארויסגעברענגט געווארן פון די קארנעל שפיטאל אין מאנהעטן, אין די קומענדיגע מינוטן וועט עס ווערן אריינגעברענגט בהיכל ביהמ"ד קהל ישועת ישראל סקולען אויף די פיר און פופציגסטע סטריט אין בארא פארק, וואו הונדערטער אידן זענען שוין פארזאמלט זיך צו געזעגענען פונעם געטרייען און באליבטן מנהיג.
***
מוצאי שבת קודש 12:30 ביינאכט
פון די סקולענע קהילה איז יעצט באשטעטיגט געווארן אז די גרויסע לוויה פון כ"ק אדמו"ר הרה"ק מסקולען זי"ע וועט זיך אנהייבן מארגן זונטאג צוועלף אזייגער מיטאג, בהיכל בית מדרשו של רבי אין סקולענער בית המדרש אויף די פיר און פופציגסטע סטריט אין בארא פארק. נאך די הספדים וועט מען באגלייטן די מיטה ברחובות העיר אויפן וועג קיין מאנסי, וואו דער רבי קומען לקבורה אויפן וויזניצע בית החיים אין מאנסי, נעבן זיין גרויסן טאטן און זיידן, די הייליגע צדיקים לבית סקולען, נשמתם בגנזי מרומים.
***
מוצאי שבת קודש 12:00
כ"ק אדמו"ר מסקולען מאנסי שליט"א איז אנגעקומען צום קארנעל שפיטאל, וואו עס זענען פארזאמלט א גרויסע ציבור אידן ארום די מיטה פונעם רבי'ן זצ"ל, יללות און בכיות הערט זיך אין יעדן ווינקל, קליינע און גרויסע קלאגן אויף דעם גרויסן אבידה, דער צדיק וקדוש אויף וועם אלע האבן ארויפגעקוקט, און געהאפט זיך צו קענען דערווארעמען לאורו הגדול נאך לאנגע יארן, און איז צוליב אונזערע עוונות פריהצייטיג אוועקגעריסן געווארן.
***
ויהי נועם נשבת במוצאי שבת
די שוידערליכע בראך רייסט און קלאגט ביי יעדן איד באשר הוא שם, אידישע קינדער זענען צוטרייסלט פארלירנדיג דעם אדם הגדול און מנהיג ישראל, שר וגדול נפל היום בישראל.
בבית מדרשו של רבי, דארט וואו דער רבי האט אפגעראכטן די עבודת הקודש בסילודין, איז די פרוכת געווארן אראפגענומען פון ארון הקודש, און א שרעקליכע יתמות נעמט ארום די פיר ווענט פון דעם הייליגן מקום קדוש.
גדול כים שברינו, אוי מי ירפא לנו
