חסידי ומעריצי בית סקולען נעמען אויף מיט פרייד די מעלדונג מטעם בית כ"ק אדמו"ר מסקולען שליט"א פון לינדען, אז דעם קומענדיגן חול המועד סוכות וועט דער רבי שליט"א צום ערשטן מאל אפרעכטן א טיש לכבוד החג, אינעם עיר ואם בישראל לינדען ניו דזשערזי, וואו דער רבי איז ערווארטעט זיך אריבערצוציען בקרוב הימים אוועקצושטעלן דעם שיינעם סקולענער הויף.
דער רבי שליט"א וועלכער איז דער צווייטער זון פון כ"ק אדמו"ר מסקולען זצ"ל, פון וועמענס הסתלקות מען שטייט א קארגע חודש אפגערוקט, וואוינט דערווייל אין בארא פארק זייענדיג א איידעם ביי כ"ק אדמו"ר מטשערנאביל שליט"א, דערווייל טוט דער רבי שליט"א מיטהאלטן די תפילות און טישן בצל הקודש פון אחיו הגדול כ"ק אדמו"ר מסקולען שליט"א בבית מדרשו של אביו וזקינו, ביז דער רבי וועט זיך אריבערציען קיין לינדען און מייסד זיין דעם חצר הקודש לשם ולתפארת.
אצינד ווערט געפלאנט א גרויסע סקולענע שמחת בית השואבה אין לינדען, וואס וועט זיין די ערשטע טיש וואס דער רבי שליט"א וועט פראווענען אליינס נאכן איבערנעמען דעם כתר האדמורו"ת, די גרויסע מעמד וועט פארקומען זונטאג חול המועד ביינאכט, אין די גרויסע סוכה נעבן ביהמ"ד באבוב אין לינדען, וואו עס איז ערווארטעט א ריזן ציבור תושבי העיר, און חסידי ומעריצי בית סקולען פון נאנט און ווייט.
