א היסטארישע מעמד הכנסת ספר תורה איז פארגעקומען אינעם עיר האבות ראצפערט, וואו עס האבן זיך באטייליגט א ריזן ציבור אידן פון איבער אלע עקן פון דער וועלט. דער מעמד איז פארגעקומען א קארגע מעת לעת איידערן יומא דהילולא קדישא פון דעם פועל ישועות בקרב הארץ רבינו נפתלי הירצקא מ'ראצפערט זי"ע וועלכע געפאלט אויס אום ערב יום הקדוש.
דער מקום ווערט אנגערופן "חצר הישועות" וואס זה שמו נאה לו, נאך וואס אומצאליגע אידן זעען אין די לעצטע יארן אפענע ישועות בעניני רפואות ופרנסה ובפרט בעניני שידוכים, נאך וואס מען האט מתפלל געווען אויף דעם הייליגן ציון הקדוש.
מיט צוויי יאר צוריק, האט זיך געפונען אויפ'ן ציון הק' אן אייניקל פונעם בעל ההילולא, הר"ר חיים אברהם בראך הי"ו, וועלכער האט זיך אונטערגענומען מנדב צו זיין א ספר תורה צום ראצפערטער בית המדרש סמוך ונראה צום ציון הקדוש. אצינד, האלטנדיג ביים גומרה של תורה, איז באשטימט געווארן דער געהויבענער היסטארישער מעמד הכנסת ספר תורה אויף מיטוואך בשבוע שחל בו יום הכיפורים העעל"ט.
דינסטאג עשי"ת האט זיך שוין אין מערערע לופטפעלדער איבער די וועלט געזעהן א ווירבלענדע שמחה של מצוה, וואו מען האט געזעהן אידן פון אלע שיכטן און קרייזן קומען צו פארן צום געהויבענעם שמחה.
צום באשטימטן שעה זענען זיך צונויף געקומען אין שטאט ראצפערט א ריזן ציבור חסידים ואנשי מעשה, וואו מען האט צוערשט געכאפט א טבילה אין דעם ניי פארענדיגטע מקוה טהרה, און פון דארט איז מען ארויף צום ציון הק' וואו עס איז אפגעראכטן געווארן א הימל שפאלטענדער "מעמד פתיחת שערי שמים" על ציון הקדוש. אנגעפאנגען מיט אמירת תהלים און מיט'ן זינגען ווארימע ניגוני התעוררות פון פריערדיגע צדיקים, און דאן איז געקומען דער הויכפונקט פון דער מעמד, ווען דער גאסט רעדנער, דער פה מפיק מרגליות, הרה"ג רבי מאיר צוויבעל שליט"א, וועלכער איז זעלבסט אן אייניקל פונעם בעל ההילולא האט געעפענט זיין לשון לימודים און אויפגעריסן אלע טויערן פון די הימלען מיט זיינע הארצרייסענדע דיבורים.
נאכ'ן מעמד איז דער ציבור אריבערגעגאנגען צו א ספעציעלן שאטער וואו עס איז פארגעקומען דער געהויבענער "מעמד כתיבת האותיות". דער מעמד איז פארגעקומען באגלייט מיט ווארימע ניגוני התעוררות ווען דער גאנצער ציבור זינגט מיט כאיש אחד בלב אחד.
ביים מעמד כתיבת האותיות האבן זיך אנגעזעהן א צאל רבנים חשובים ואנשי שם וועלכע זענען ספעציעל זיך געקומען באטייליגן אין דעם געוואלדיגן שמחה, און דערביי געהאט א געלעגנהייט אריינצושרייבן אן אות אין דעם היסטארישן ספר תורה.
עס האבן אויפגעטרעטן מיט פאסיגע דרשות הגה"צ אב"ד קהל חסידים ירושלים, מיט וועמען דער נדיב הספר תורה איז ספעציעל נאנט, און הרה"צ אב"ד טאלל טימבער ניו דשערסי, וועלכער איז א חברותא מיט'ן נדיב.
צום סוף האט דער נדבן פערזענליך אויפגעטרעטן מיט גאר ווארימע דיבורים, ארויסברענגענדיג זיינע הרגשים אויף דעם הייליגן זכי' און זיך באדאנקענדיג פאר אלע משתתפים מארבע כנפות הארץ וועלכע זענען ספעציעל געקומען צו פארן להשתתף בשמחת התורה.
נאכ'ן גולל זיין דעם ספר תורה איז דער תהלוכה ארויס ברחובה של עיר אויפ'ן וועג צום שטח הכנסת אורחים ד'ראצפערט. אין א היסטארישן מעמד וואס דער שטאט האט שוין נישט געזעהן פאר כאטש אכציג יאר האבן עטליכע הונדערט אידן געטאנצט אין די גאסן בריקודא וחינגא מיט א שמחה של מצוה וואס איז געווען אויסגעגאסן אויף אלעמענ'ס פנימ'ער.
דאן איז דער גאנצער ציבור אריין באגלייטן דעם ספר תורה אינעם פראכפולן בית המדרש/שאטער בחצר הקודש ראצפערט. דארט איז נמשך געווארן די ריקודין של שמחה. דערנאך האט הרה"ח רבי אליהו שלמה הכהן קאהן שליט"א, מנהל בית רחל בקרית יואל פארגעזאגט מיט א התעוררות דעם קאפיטל "לדוד מזמור" פסוק בפסוק.
פון דארט איז דער ציבור געפארן צוריק צום האטעל וואו עס איז אפגעראכטן געווארן דער סעודה לגומרה של תורה.
ביים סעטודה האט אויפגעטרעטן מיט א הערליכן דרשה הרבני הנגיד המפואר מוה"ר ירמי' אליעזר בראך הי"ו, פאטער פונעם בעל שמחה. דאן האט אויפגעטרעטן הגה"צ רבי אברהם שלמה כ"ץ שליט"א, אב"ד אנשי האוועל נ. דז. ביי וועמען דער בעל שמחה איז א קביעות'דיגער מתפלל.
דורכאויס דעם מעמד איז געזונגען געווארן גאר ווארימע ניגונים, ספעציעל האט ארויסגעשיינט א פרישער יצירה, א ניגון אויף די ווערטער "קה זכות אבות יגן עלינו", וועלכע איז ספעציעל פארפאסט געווארן לכבוד דעם הכנסת ספר תורה.
דער הויכפונקט פונעם מעמד איז געווען ווען דער בעל שמחה הר"ר חיים אברהם בראך הי"ו האט אויפגעטרעטן, און מיט ווארימע ווערטער געדאנקט דעם רבש"ע פאר'ן אים געבן די זכי' צו זעהן דעם אור פונעם צדיק און זיך מקשר זיין צו אים, און באזונדערס פאר'ן זכי' צו קענען שרייבן א ספר תורה לשמו ולזכרו פונעם צדיק.
צום סוף פונעם מעמד האט הרה"ח רבי אלי' שלמה קאהן שליט"א פרעזענטירט א ספעציעלן האנט-געשריבענעם מזכרת פון חצר הקודש ראצפערט פאר'ן נדיב הי"ו.
מיט ברכת המזון איז מכובד געווארן הרה"ח ר' פנחס אליעזר ווייס הי"ו, זיידע פונעם נדבן. און בלויז אין די פריע פארטאגס שטונדן האט זיך דער ציבור צושפרייט און געגאנגען זיך צולייגן פאר'ן קומענדיגן טאג.
דאנערשטאג, שלש עשרה מדות אינדערפרי, איז דער ציבור געפארן קיין עיר הקודש קערעסטיר, וואו מען האט געזאגט סליחות י"ג מדות בהתעוררות יתירה אין "רבי ישעי'לעס הויז", און דאן איז מען ארויף געגאנגען פוקד זיין ציון קדשו פון הרה"ק רבי ישעי'לע זי"ע וואו הרה"ג רבי מאיר צוויבעל שליט"א האט מעורר געווען דעם ציבור און מען האט געזאגט תהלים אינאיינעם בקול חוצב להבות אש.
דער "ראצפערטער חבורה" האט דאן ממשיך געווען די נסיעה מיט'ן מקיים זיין מנהג תשליך אויפ'ן באדאראג טייך, און דאן ווייטער געפארן צום שטאט אוהעל, וואו מען האט געדאווענט מנחה און פוקד געווען על ציון קדשו פון הייליגן ישמח משה זי"ע. פון דארט האט די חבורה ממשיך געווען צום שטאט ליסקא וואו עס ליגט דער הייליגער צדיק בעל אך פרי תבואה זי"ע, און צום שטאט "קאלוב" וואו מען האט ווידער מתפלל געווען און געזונגען ניגוני קדשו.
בפחד ואימה האט מען פון דארט ממשיך געווען צום הייליגן שטאט ראצפערט, אריינגייענדיג אינעם טאג פון די יומא דהילולא קדישא. עס איז פארגעקומען א הערליכער יארצייט סעודה. דער אויבן אן איז באשיינט געווארן דורך די חשוב'ע רבנים, נכדי הרה"ק בעל ההילולא. עס האט אויפגעטרעטן דער יושב ראש הנסיעה הרה"ג רבי אלי' שלמה קאהן שליט"א, וועלכער האט ארויס געברענגט די געוואלדיגע זכיה זיך צו געפונען אויף אזא הייליג מקום אין אזא הייליגע און מסוגל'דיגע צייט, ווי עס שטייט בשם הרה"ק מאפטא זי"ע אז צדיקים באקומען מתנות ביומא דהילולא צו קענען משפיע זיין פאר די וואס זענען מסתופף בצלו.
נאך ברכת המזון האט מען מקיים געווען דעם מנהג הכפרות, און דאן איז מען זיך געגאנגען אפרוען האלטנדיג שוין נאך א יומא אריכתא און א חטיבא אחת פון שמחה והתעוררות.
אינדערפרי, נאך סליחות און תפלת שחרית, איז צוגעשטעלט געווארן א רחבות'דיגן פת שחרית לכבוד האורחים ולכבוד מצוות היום. אויך האט הרה"ג ר' אלי' שלמה קאהן שליט"א געטיילט לעקאך כנהוג לסימנא טבא.
דערנאך איז דער ציבור ארויף צום ציון הקדוש לקראת היומא דהילולא קדישא. עס איז דארט געהערט געווארן דברי התעוררות, און מען האט געזאגט תהלים מיט א להב אש איינצורייסן אין אט דעם הייליגן מאמענט.
יום הקדוש אויפדערנאכט, בעפאר כל נדרי האט אויפגעטרעטן הרה"ג ר' אלי' שלמה קאהן שליט"א וועלכער האט מעורר געווען דעם ציבור מיט הייליגע דיבורים לכבוד היום.
צו כל נדרי האט יורד געווען לפני התיבה דער לאנגיעריגער ראצפערטער בעל תפלה, הרה"ג ר' משה צבי כהנא שליט"א פון מאנסי, וועלכער האט בנועם קולו פארגעדאווענט די תפלות פון דעם הייליגן נאכט.
נאך מעריב און שיר היחוד, האט הר"ר שמעון לעפקאוויטש הי"ו נכד רבי הירצקא'לע זי"ע אויפגעטרעטן, און מיט קורצע אבער פאסיגע דיבורים ערווענט די עבודת הקודש וואס ווערט אריינגעלייגט א גאנץ יאר בחצר הקודש הכנסת אורחים. ער האט דערביי מודיע געווען דעם ציבור אז עס ווערט פראקלאמירט א "ציגל קאמפיין", וואו יעדער אייניקל פונעם צדיק המונח פה וועט האבן א זכי' אז זיין נאמען זאל ווערן איינגעקריצט עלי כותלי האהל הקדוש, און זיין א פערמענאנטער "קוויטל" וואס וועט ליגן באהלו של צדיק קביעא וקיימא.
תיכף האבן זיך א ריזיגער ציבור משתתפים ווארים אנגערופן און דארט באותו מעמד צוגעזאגט צו קויפן א מספר פון מערערע "ציגל" וועלכע זאל זיין לזכרון תמיד ביים צדיק, אלס א שטענדיגער זכי' וואס וועט אנהאלטן עד יקיצו וירננו שוכני עפר בב"א.
דערנאך האט מען פארציילט ברוב עם דעם משל פונעם בעל ההילולא רבי הירצקא'לע זי"ע, וואס ער פלעגט זאגן יעדעס יאר יום הקדוש אויפדערנאכט: א ציגיינער האט זיך אנגעקויפט א גאנץ יאר ברוינפן אויף בארג, אבער ווען עס איז געקומען סוף יאר און ער האט געדארפט מאכן א חשבון מיטן סוחר האט ער אזוי געזאגט: מיין האר, קיין געלט צו באצאלן האב איך נישט, נאר איין זאך קען איך דיר טוהן, אזויווי איך קען שיין טאנצן וועל איך דיר אפטאנצן דעם חוב. דער צדיק פלעגט דאס זאגן אויף אונגאריש מיט'ן לשון: "אוראם, נינטשען מעגפענזי דע טע טאנצאלאם".
האט דער צדיק אויסגעפירט אז מיר זענען שולדיג א גרויסן חוב פארן רבוש"ע פון א גאנץ יאר און מיר האבן ליידער נישט מיט וואס צו באצאלן אבער טאנצן קענען מיר יא פארן רבוש"ע. און אזוי האט ער זיך גענומען טאנצן מיט גרויס התלהבות "רננו צדיקים" פאר א לענגערע צייט.
אצינד, באתרא דמר, האט דער ציבור אויך זיך ארויסגעלאזט אין א הייליגן ריקוד כמנהגו של צדיק, וואו מען האט געזונגען "רננו צדיקים". עס איז געווען גאר א ספעציעלער מחזה ווען דער גאנצער ציבור זינגט מיט א התלהבות דקדושה שפירנדיג ווי די ווערטער פונעם צדיק זענען עושה רושם און מען קען טאקע מיט אט דעם ריקוד אויס'פועל'ן א גוט יאר לנו ולכל ישראל.
יום הקדוש אינדערפרי צו אדון עולם איז צוגעגאנגען אן אייניקעל הרבני הנגיד הר"ר יצחק אייזיק (ב"ר יושע) לעפקאוויטש הי"ו וועלכער האט פארגעזאגט די פסוקי דזמרה מיט א ספעציעלע נעימות.
צו תפלת שחרית איז צוגעגאנגען הרה"ח ר' אברהם מרדכי רייכמאן הי"ו פון קרית יואל, וועלכער האט מיט א רגש'דיגן קול צענומען די הערצער פון אלע משתתפים.
ווען מען האט געליינט דאס ערשטע מאל אין דעם ניי-געשריבענעם ספר תורה. דער נדבן הר"ר חיים אברהם בראך הי"ו האט עולה געווען ווען ער האט דערביי מיט א התרגשות'דיגן קול געמאכט די ברכה "שהחיינו" וואס האט אפגעדונערט אינעם ראצפערטער הויף.
דער בעל תפלה אויף מוסף איז הרה"ג רבי משה צבי בערקאוויטש שליט"א, ראש ישיבת "שער נפתלי" הנקראת על שמו של רבינו הקדוש רבי נפתלי הירצקא מ'ראצפערט זי"ע.
נאך תפלת מנחה איז דער ציבור אריבער אינאיינעם צום בנין בית המדרש ד'ראצפערט, וואו מען האט יעצט אריינגעטראגן דעם ספר תורה צום ערשטן מאל. הרה"ח ר' ירמי' אליעזר בראך הי"ו אבי הנדיב האט אריינגעברענגט דעם ספר תורה להיכל בית המדרש, און האט אויך געדינט אלס בעל תפלה אויף תפלת נעילה.
מיט א געוואלדיגע שמחה און התלהבות האבן אלע באטייליגטע געדאווענט מעריב פול מיט בטחון אז מען האט אויס'געפועל'ט אלעס גוטס. נאך איידער מען האט אפילו אויסגעפאסט זענען געשטאנען פילע אידן און געטאנצט און געזונגען "האט'ס גע'פועל'ט אלעס גוטס" נישט וועלנדיג זיך אוועק רייסן פון אט די הייליגע מאמענטן. ערשט דאן האט מען געמאכט הבדלה ברוב עם אינעם חצר ווי ס'איז געווען צוגעגרייט אויסצופאסטן.
דערנאך איז פארגעקומען דער יערליכער "געזעגענען" פון צדיק, ווען דער גאנצער ציבור איז ארויף צום ציון הקדוש, און געזאגט תהלים לקרוע שערי שמים. דאן האט יעדער זיך אויסגעגאסן דאס הארץ ביים צדיק, עס זענען אויסגערופן געווארן נעמען פון די וועלכע דארפן ישועות ורפואות. דערנאך האט מען געזונגען ניגוני שמחה והתעוררות פאר א לענגערע צייט, ווען יעדער לאזט איבער זיין פעקל ביים צדיק און גרייט זיך אט אהיים צו גיין מיט זעק און פעק פון ישועות ורפואות.
ויו"ט הי' עושה בצאתו בשלום. א סעודת יום טוב כיד המלך איז אפגעראכטן געווארן, וואו עס האבן ווידער אויפגעטרעטן פילע נכדי רבינו וחסידים ואנשי מעשה מיט פאסיגע דיבורים לכבוד היום.
מוצאי יום הקדוש כחצות הלילה האט זיך דער ציבור געזעגנט פונעם הייליגן פלאץ און ארויסגעלאזט למחוז חפצם, זייענדיג בטוח אז מען האט גע'פועל'ט כל מילי דמיטב.
קה זכות אבות יגן עלינו!
