תושבי מאנטריאל נעמען אויף מיט פרייד די פרישע מעלדונג, אז בעוד שבועיים אין צוויי וואכן ארום, וועט מופיע זיין א חשובער גאסט בשערי העיר, כ"ק אדמו"ר מסקולען שליט"א, און פראווענען א געהויבענע שבת אין שטאט אויף א ערשטמאליגע פארנעם, בבית מדרשו של אביו "קהל מאור הגולה".
דער רבי שליט"א איז נישט קיין זעלטענע גאסט אין שטאט, זייענדיג בנו הגדול פונעם טאטן כ"ק אדמו"ר מסקולען זצ"ל בעל ישועת יעקב וועלכער האט געוואוינט אין מאנטריאל יארן לאנג, איז דער רבי שליט"א דארט אויפגעוואקסן אין די יונגע יארן און געשטיגן בדרכי התורה והחסידות. טאקע דארט אין דעם ביהמ"ד קהל מאור הגולה האט דער רבי געדאווענט און געלערנט פאר לאנגע יארן, און וועט זיך אצינד אומקערן למקום מגורי אביו צו משפיע זיין פאר די קהילה קדושה און כלל חסידי תושבי העיר.
שטייענדיג נאך אינעם שנת האבילות פון אביו הגדול דער רבי זצ"ל, האט דער רבי שליט"א אנגענומען די בקשה פון די תושבי העיר און חברי הקהילה, צו קומען פראווענען א שבת קודש בתוככי הקהילה, אין אט דעם בית המדרש וואו אביו הגדול דער רבי זצ"ל האט מכהן געווען ברבנות, און ווערט היינט נמשך דורך חתנו כבנו הגה"צ ר' יואל מאסקאוויטש שליט"א.
דער רבי שליט"א וועט זיין צוגאסט אין מאנטריאל אויף שבת קודש פרשת אחרי קדושים, און פראווענען די תפילות און טישן אין ביהמ"ד מאור הגולה, א גרויסע ציבור געסט איז ערווארטעט צו קומען פון נאנט און ווייט מיטהאלטן דעם שבת אויפן סקולענער שטייגער, און די עסקנים ארבעטן אויס אלע דעטאלן און איינצעלהייטן על צד היותר טוב.
