פארגאנגענעם שבת קודש פרשת בלק האט כ"ק אדמו"ר מסקולען שליט"א געוויילט אויף אפרוה, זייענדיג אין די דזשעקסאן געגנט וואס איז נישט ווייט פון לעיקוואד. אזוי ווי דער רבי האט נישט געפראוועט קיין עפנטליכע טישן דורכאויס שבת, האט דער רבי אויסגעדרוקט רצון קדשו צו מיטהאלטן שלש סעודות בצל הקודש פונעם פעטער כ"ק אדמו"ר מסקולען שליט"א פון לעיקוואד, וואס ציהט זיך אריין לאנג נאכן זמן מוצאי שבת ווי איינגעפירט אין סקולען.
דער רבי שליט"א איז צוגעפארן קיין לעיקוואד באלד נאכן זמן, און ערשינען אין סקולענער בית המדרש ביי שלש סעודות ווען דער סקולענער רבי פון לעיקוואד האט געהאלטן אינמיטן זאגן תורה. דער סקולענער רבי פון לעיקוואד האט אנטפאנגען דעם רבי'ן ביותרת הכבוד, און ביי מעריב האט דער רבי געדאווענט פארן עמוד זייענדיג בשנת האבילות, ביי הבדלה האט דער סקולענער רבי פון לעיקוואד מכבד געווען דעם רבי'ן מיט הגבהת הכוס.
