א שרעקליכע עראפלאן עקסידענט האט פאסירט די נאכט אין די לאגווארדיע לופטפעלד אין ניו יארק, ווען א עיר קאנאדע פליגער וואס איז געקומען צו פארן פון מאנטריאל און האט געלאנדעט אין לאגווארדיע, האט זיך צוזאמגעקראכט מיט א פייער טראק אויפן ראנוועי, דער פילאט און קא פילאט זענען אומגעקומען אין די עקסידענט, און בחסדי ה' זענען אלע אידישע פאסאדזשירן אויפן פליגער אפגעקומען בלויז מיט שרעק און לייכטע וואונדן.
די פליגער האט זיך געהויבן פון מאנטריאל נאך צען אזייגער ביינאכט, און האט באקומען ערלויבעניש צו לאנדן אויפן ראנוועי נומער 4 אין לאגווארדיע, אכט און דרייסיג מינוט נאך עלף ביינאכט האט די פליגער געלאנדעט אויפן ראנוועי, אבער אין די זעלבע צייט האט א פייער טראק באקומען ערלויבעניש פון די עיר טראפיק קאנטראלירער דורכצופארן די זעלבע ראנוועי, און ווען דער קאנטראלער האט אים פרובירט אפצושטעלן סעקונדעס דערויף איז שוין געווען צו שפעט אין די געשיכטע.
די פאדערשטע טייל פון די פליגער האט מיט אימפעט אריינגעקראכט אין די פייערטראק, און סעקונדעס דערויף איז די פליגער געקומען צו אן אפשטעל עטוואס ארויפציר אויפן ראנוועי. די לופטפעלד איז באלד געווארן פארשלאסן פאר לופט פארקער, און איז דערווייל נאך אפגעשפארט פאר אויספארשונגען און די נאכווייען.
אויפן פליגער האבן זיך געפונען ארום זיבעציג פאסאדזשירן, אריינגערעכנט א צאל היימישע אידן, פון די רייזנדע אויפן פליגער איז נאר באריכטעט געווארן לייכט פארוואונדעטע, און אלע זענען עוועקואירט געווארן דורך די רעטונג אגענטורן. דער פילאט און קא פילאט וואס זענען געווען אינעם קאקפיט וואס איז טאטאל צושמעטערט געווארן אין די קראך, זענען אומגעקומען אין די עקסידענט, און די פייערלעשער וואס האבן זיך געפונען אין די פייער טראק זענען קריטיש פארוואונדעט געווארן.
א העפטיגע אויספארשונג איז אקטיוו צו דערגיין וואס עס האט געפירט צו די טראגישע פליגער קראך, און די אידישע רייזנדע דאנקן און לויבן דעם אויבערשטן אויף די גרויסע חסדים וואס זיי האבן מיטגעלעבט.
