היינט נאכמיטאג איז פארגעקומען א ספעציעלע מסיבה פאר די הונדערטער כולל אינגעלייט אינערהאלב די מבצר התורה כולל אמת ואמונה וויזניץ אין מאנסי, וואו עס איז פראקלאמירט געווארן א מאסיווע אונטערנעמונג דורך די הנהלת הכולל צו דראסטיש העכערן די געהאלט פאר די חברי ורבני הכולל, מיטן הילף פון א פאראייניגטע שטיצע דורך צענדליגע נדיבים און פילאנטראפן תומכי תורה ומחזיקי תורה.
נעכטן זונטאג נאכמיטאג איז פארגעקומען אן אסיפת היסוד אין שטוב פון הנגיד המפורסם ר' אליעזר שיינער הי"ו אין מאנסי, פאררופן דורך דער נשיא הכולל כ"ק אדמו"ר מוויזניץ שליט"א פון מאנסי, וועלכער האט פערזענליך געלאדנט א געקליבענע צאל נדיבים בעם מיטן ציהל אוועקצושטעלן א פעסטע יסוד פאר די פרישע אונטערנעמונג. ביי רייך געדעקטע טישן זענען געזעצט געווארן די נגידי העדה, און געהערט ווארעמע דרשות זיך אנציווארעמען צו נעמען א חלק אין דעם היסטארישן אונטערנעמונג.
עס האט אויפגעטרעטן דער בעל אכסניא הנגיד המפואר ר' אליעזר שיינער הי"ו, וועלכער האט אויפגעפלאקערט די הערצער צו זיין עושים ומעשים צו העלפן שטיצן תורה, און געברענגט ערשטהאנטיגע באריכטן פון די מאסיווע אדירי התורה פראיעקט אינערהאלב ישיבה בית מדרש גבוה, וואס האט אין די לעצטע דריי יאר באוויזן אנצודרייען א מהפכה אדירה בעולם התורה צו שטיצן לומדי תורה מתוך הדחק.
דערנאך האט דער וויזניצער רבי שליט"א משמיע געווען דברות קודש און גאר שטארק מחזק געווען די אנוועזנדע נדיבים בעם צו זיין א טייל פון דעם פרישן פראיעקט מחזק צו זיין הני ברכי דרבנן דשלהי. אויפן פלאץ איז געשאפן געווארן א קרן יסוד פון מיליאנען דאללארן, ווען אין שפיץ האבן די צוויי הויפט נדבנים, הנגיד ר' אליעזר שיינער הי"ו, און הנגיד ר' יחזקאל אביגדור איינהארן הי"ו מגדולי תומכי מוסדות וויזניץ מאנסי, מנדב געווען יעדער באזונדער א דריטל מיליאן פאר דעם פרישן פראיעקט.
היינט נאכמיטאג איז פארגעקומען א ספעציעלע מסיבה פאר די העכער פיר הונדערט חברי ורבני הכולל, אין א פראכטפולע זאל אין שטאט מאנסי, אין שפיץ פון כ"ק אדמו"ר מוויזניץ שליט"א פון מאנסי נשיא הכולל, דערביי איז געמאלדן געווארן איבער די פרישע פראיעקט, אז צום קומענדיגן זמן הלימודים תיכף נאך פסח, וועט געהויבן ווערן די כולל תמיכה מיט דאפלט ווי ביז יעצט, מחזק צו זיין די לומדי תורה בטהרה.
