נעכטן ביינאכט אין ארץ ישראל איז פארגעקומען אן אייגענארטיגע אסיפה וואו כ"ק אדמו"ר ממיאלען שליט"א האט צוזאמגערופן אלע חסידים בבית מדרשו אין קרית גת, ווען דערביי האט דער רבי געמאלדן אז ער גרייט זיך איבערפלאנצן די הויפטקוואטיר פון די חסידות פון קרית גת קיין בני ברק, אין די נייע געגנט "מתחם הסופרים" וואס ווערט געבויעט אין די יעצטיגע טעג.
כ"ק אדמו"ר ממיאלען שליט"א וועלכער איז דער יונגסטער זון פון כ"ק אדמו"ר מקרעטשניף קרית גת זצ"ל, און א איידעם ביי כ"ק אדמו"ר מראדאשיץ זצ"ל, האט אוועקגעשטעלט זיין שיינעם הויף אין שטאט קרית גת, נאכן הסתלקות פון זיין פאטער דער קרעטשניפער רבי זצ"ל. אין די לעצטערע טעג האט דער רבי צוזאמגערופן קהל חסידיו אויף א אסיפה, מעמד יסוד הקהילה הק' מיאלען אין בני ברק, און דערביי האט דער רבי אויסגעדרוקט רצון קדשו אז ער גרייט זיך צו מופן קיין בני ברק, און דארט איבערפלאנצן דעם שיינעם הויף.
די נייע געגנט "מתחם הסופרים" געפונט זיך הארט נעבן די עיר התורה והחסידות בני ברק, עס ווערט שוין געבויעט פאר א שטיק צייט, און א גרויס טייל פון די בנינים שטייען שוין, אצינד איז געמאלדן געווארן איבער די ערשטע חסידישע הויף וואס וועט זיך איינקוואטירן דארט אינעם נייעם געגנט.
