אלפי חסידי פאפא גרייטן זיך אויף א היסטארישע שבת, ווען דעם שבת נחמו פרשת ואתחנן ביום י"ג אב, געפאלט די יומא דהילולא קדישא פון כ"ק אדמו"ר הגה"ק בעל ויחי יוסף מפאפא זי"ע, ובהאי שעתא ווערט אפגעצייכנט גאנצע פערציג יאר להסתלקותו לגנזי מרומים, גרייכענדיג פערציג שנות נשיאות פון כ"ק אדמו"ר מפאפא שליט"א, וועלכער איז דאן אויפגענומען געווארן למלא מקום אביו בקודש בהמשכת העדה.
די היסטארישע שבת וואס וועט געפראוועט ווערן בקרתא קדישא, אין קרית פאפא וועסטשעסטער סמוך ונראה צום ציון הק' פונעם בעל ההילולא, וועט צונויפברענגען טויזענטער חסידים פון נאנט און ווייט, וואס וועלן מיטהאלטן דעם שבת יארצייט בצילא דמהימנותא, פילע הכנות און איינריכטונגען ווערן געמאכט צו קענען אקאמאדירן אזא גרויסע עולם, אריינגערעכנט א ריזן שאטער וואס ווערט אויפגעבויעט פאר די סעודות שבת לכל הקהל הקודש, פרישע פלעצער אין די בניני הישיבה פאר הכנסת אורחים, פארבעסערטע שאסייען און דורכגענג פאר די פילצאליגע געסט, און נאך פילע איינריכטונגען וואס ווערט אהערגעשטעלט דורך טעטיגע עסקנים.
די צענטראלע מעמד עלי' לציון וועט פארקומען פרייטאג עלף דרייסיג פארמיטאג, ווען כ"ק אדמו"ר מפאפא שליט"א וועט ארויפגיין בראש קהל חסידיו צום ציון הק' פון מר אביו בעל ההילולא, און דערביי אויספועל'ן ישועות לכל הקהל הקודש ברוחניות ובגשמיות. די צענטראלע יארצייט טיש און סיומי הש"ס און משניות לזכרו פונעם בעל ההילולא, וועט פארקומען שבת נאכמיטאג ברוב פאר והדר, ברוב עם הדרת מלך.
לכבוד די גרויסע שבת איז ערשינען א רייע ספרים און קונטרסים במשנתו פונעם בעל ההילולא, זכרונות און סיפורים און לענגערע שטיקער היסטאריע, מאוצרות הגנזים לבית פאפא ולמעלה בקודש.
