נאך וואס עס האט ליידער פאסירט א שרעקליכע געשעעניש ביום הושענא רבא, ווען א ספר תורה איז אנידערגעפאלן אויף די ערד ביים אנגרייטן לכבוד יום טוב, איז באשטימט געווארן בפקודת הקודש פון כ"ק אדמו"ר מפאפא שליט"א אינאיינעם מיט די חברי בית הוראה דקהל קהילת יעקב פאפא, א יום תפילה ותענית אויף היינט מאנטאג תענית שני קמא.
בהוראת הקודש וועלן אלע חסידים קובע זיין א תענית פאר א האלבע טאג, היינט מאנטאג, קומענדיגן דאנערשטאג און מאנטאג, די טעג פון תענית בה"ב, און עוסק זיין בתפילה ותחנונים כראוי וכנכון. די וואס האבן צוגעזעהן די שרעקליכע פאסירונג, דארפן פאסטן היינט מאנטאג די גאנצע טאג, און די אנדערע צוויי תעניתים בלויז א האלבע טאג.
וויבאלד באמת וואלט מען געדארפט פאסטן דריי גאנצע טעג, האט דער רבי קובע געווען אז מען זאל אויסלייזן די אנדערע האלב תענית מיט כופר נפש פון ניין דאללער, און ווער עס איז נישט ביכולת צו פאסטן אפילו א האלבע טאג, און אזוי אויך די בחורים און קינדער, זאלן זיך אויסלייזן מיט אכצן דאללער א טאג.
היינט מאנטאג פארטאגס האט מען זיך צוזאמגענומען אויף אמירת כל ספר תהלים אין ביהמ"ד הגדול, און ביי שחרית איז באשטימט געווארן צו זאגן די סליחות לתענית שני קמא.
