תלמידי וחסידי פאפא גרייטן זיך מיט עקסטאז מיטצוהאלטן א זעלטן געהויבענע שמחה בצל הקודש, ווען עס וועט געפראוועט ווערן ברוב פאר והדר די שמחת הבר מצוה פונעם ערשטן אור אייניקל ביי כ"ק אדמו"ר מפאפא שליט"א, הבחור אהרן נ"י זון פונעם רבי'נס עלטסטע אייניקל הרב לייבוש גרינוואלד שליט"א, זון פון הגה"צ ר' מאיר גרינוואלד שליט"א דומ"ץ פאפא, בנו הגדול פונעם רבי'ן, און איידעם ביי כ"ק אדמו"ר מפאפא שליט"א.
די פרייליכע שמחה ברענגט אויף גרויס התרגשות ביי אלע חסידים, שטייענדיג אריבער פערציג יאר זינט כ"ק אדמו"ר מפאפא שליט"א האט איבערגענומען די כתר האדמורו"ת, האלטענדיג נאך בעפאר די חתונה פון זיין עלטסטן קינד, און דורכאויס די יארן זענען די שמחות געוואקסן בליעה"ר, די חתונה פונעם עלטסטן קינד און אזוי ווייטער, און אצינד האלט מען שוין ביי די בר מצוה פון א דור רביעי!
די צעירי הצאן די פרחי החסידים, מאכן שוין די ריכטיגע הכנה לכבוד די שמחה, מיטן לערנען שעות רצופות אינאיינעם, וואס וועט געשאנקען ווערן אלס דורן דרשה פארן רבי'ן בשעת די שמחה. די גרויסע שמחה וועט פארקומען דעם קומענדיגן מוצאי שבת קודש פרשת ויחי, אין ביהמ"ד הגדול פאפא אין וויליאמסבורג במקהלות אלפי חסידים.
