פון חצר הקודש פאפא איז געמאלדן געווארן אז אויך דאס יאר וועט כ"ק אדמו"ר מפאפא שליט"א זיך ארויסלאזן אויף א מסע הקודש מיטן נאמען "עזרת אבותינו", צו פוקד זיין די קברי אבות די מקומות הקדושים, לרגל די יומא דהילולא קדישא פון הגה"ק בעל ויגד יעקב מפאפא זי"ע, וואס געפאלט אויס דעם קומענדיגן מוצאי שבת פרשת תרומה ב' אדר.
דער רבי וועט זיך ארויסלאזן אונטערוועגנס מיטוואך פרשת תרומה נאכמיטאג, און דאנערשטאג אינדערפרי אנקומען צום שטאט וויען אין עסטרייך. פון דארט וועט מען פארזעצן די נסיעה צו די מקומות הקדושים אין פרעשבורג, מקום מנוחת הקודש פונעם הייליגן חתם סופר זי"ע, און אין די שטעט ניקלשבורג און העלישוי.
שבת קודש פרשת תרומה שבת שקלים שבת ראש חודש אדר, וועט געפראוועט ווערן אויף א גרויסע פארנעם אינאיינעם מיט פילע חסידים וואס וועלן קומען צו פארן לחסות בצל הקודש, אינעם עיר האבות פאפא אין אונגארן, אין די היסטארישע עץ חיים שוהל וואו דער הייליגער בעל ההילולא האט אפגעראכטן די עבודת הקודש בחיים חיותו.
מוצאי שבת קודש וועט פארקומען די צענטראלע יארצייט טיש און סעודת מלוה מלכה, נאכגעפאלגט מיט די עלי' לציון ברוב עם הדרת מלך, להיפקד בדבר ישועה ורחמים. זונטאג אינדערפרי נאך שחרית און א סיום משניות לכבוד די יומא דהילולא קדישא, וועט מען פארזעצן די נסיעה צו נאך עטליכע מקומות הקדושים, אין די שטעט קאלוב, בישטינא, חוסט, סאטמאר, קערעסטיר, ליסקא, אוהעל, און טשעטשאוויץ. דינסטאג נאכמיטאג וועט מען זיך ארויסלאזן אויפן וועג צוריק קיין ניו יארק אנגעפולט מיט השפעות טובות.
