מיט גרויס פרייד האבן תלמידי וחסידי צאנז קלויזענבורג אויפגענומען די פרייליכע בשורה פון הרחבת גבולי הקדושה אינערהאלב די מעכטיגע אימפעריע פון מוסדות צאנז קלויזענבורג אין מאנסי, אז מיטן אויבערשטנס הילף איז מען אריין אין קאנטראקט אפצוקויפן א הערליכע גרויסע געביידע פארן בית חינוך לבנות המתנוסס לתפארה אינעם עיר ואם בישראל מאנסי.
די רעדע איז פון א גרויסע פראכטפולע געביידע וואס געפונט זיך אויף 86 הייוויו ביים עק פון מאנסי נעבן די מאנטיבעלא געגנט, א בנין מפואר וואס איז דירעקט געבויעט געווארן אלס אכסניא של תורה פאר א מיידל שולע, און איז אצינד געשטאנען צום פארקויפן פארן פרייז פון פערצן מיליאן דאללער. בברכתו ובעידודו פון כ"ק אדמו"ר מצאנז קלויזענבורג שליט"א זענען די עסקני המוסדות אריינגעשפרינגען אינעם פראיעקט אפצוקויפן די געביידע, און דערמיט לינדערן דעם לחץ זו הדחק וואס הערשט אינעם ביז יעצטיגן לאקאל פון די צאנז קלויזענבורג מיידל שולע, וואס נויטיגט זיך דריגענד אין א אייגענע באקוועמע אכסניא.
די נייע פיר שטאקעדיגע געביידע וואס נעמט אריין איבער פערציג טויזענט סקווער פיס, פארמאגט גרויסע און לעכטיגע קלאס צימערן, ברייטע האלוועיס און א ריזן עס זאל, מיט גענוג פלאץ פאר אלע אפטיילונגען פון די בית חינוך לבנות, אזוי אויך פארמאגט די געביידע גרייטע לעגאליטעט צו קענען ארויפבויען נאך עטליכע שטאק, אין פאל עס פעלט זיך ווידער אויס צו מרחיב זיין די גבולי הקדושה.
