אין די גרעסטע ישיבה איבער די וועלט, בית מדרש גבוה ד'לעיקוואד, איז היינט פארצייכנט געווארן א היסטארישע אנטוויקלונג, ווען הגאון רבי יוסף חיים שניאור קאטלער שליט"א, בנו יחידו פונעם ראש ישיבה הגאון הגדול רבי מלכיאל קאטלער שליט"א, האט פארגעלערנט זיין ערשטן שיעור בהיכל הישיבה, שאפנדיג אן אטמאספערע פון המשכת השלשלת אין די לעיקוואדער ישיבה, ווי איינגעפירט אין די ליטווישע עולם התורה, אז די ראשי ישיבות ברענגען אריין זייערע קינדער צו מרביץ תורה זיין אין ישיבה.
ווי באקאנט איז אין ישיבה בית מדרש גבוה ד'לעיקוואד פארהאן פיר ראשי ישיבות, ווען אלע זענען ממשיך דעם שיינעם שלשלת פון זייער גרויסן זיידן דער מייסד הישיבה, הגאון הגדול רבי אהרן קאטלער זצ"ל. הגאון הגדול רבי ארי' מלכיאל קאטלער שליט"א, זון פונעם ראש ישיבה הגאון הגדול רבי שניאור קאטלער זצ"ל, זון פונעם ראש ישיבה הגאון הגדול רבי אהרן קאטלער זצ"ל. ואתו עמו איז דער ראש ישיבה הגאון הגדול רבי דוד שוסטאל שליט"א, וועלכער איז אן איידעם ביי הגאון הגדול רבי שניאור קאטלער זצ"ל. די אנדערע צוויי ראשי ישיבות זענען הגאון הגדול רבי ירוחם אולשין שליט"א, און הגאון הגדול רבי ישראל ניומאן שליט"א, וועלכע זענען ביידע איידימער ביי הגאון רבי דוב שווארצמאן זצ"ל, אן איידעם ביים ראש ישיבה הגאון הגדול רבי אהרן קאטלער זצ"ל.
אין די לעצטע פאר יאר האבן די אנדערע דריי ראשי ישיבות שוין אריינגעברענגט זייערע קינדער צו מרביץ תורה זיין און פארלערנען שיעורים אין ישיבה, הגאון הגדול רבי דוד שוסטאל שליט"א האט געשטעלט זיין זון הגאון רבי אהרן שוסטאל שליט"א, הגאון הגדול רבי ירוחם אולשין שליט"א האט געשטעלט זיין זון הגאון רבי אהרן אולשין שליט"א, וואס ביידע טראגן דעם נאמען נאכן עלטער זיידן דער ראש ישיבה הגאון הגדול רבי אהרן קאטלער זצ"ל, און הגאון הגדול רבי ישראל ניומאן שליט"א האט געשטעלט זיין איידעם הגרי"א ביוסל שליט"א.
היינט זונטאג מיטאג איז די המשכת השלשלת ווידער אנטוויקלט געווארן, ווען דער ראש ישיבה הגאון הגדול רבי מלכיאל קאטלער שליט"א האט געשטעלט זיין איינציגער זון הגאון רבי יוסף חיים שניאור קאטלער שליט"א צו פארלערנען א שיעור אין ישיבה. דער יונגער מרביץ תורה טראגט דעם נאמען פון זיין זיידן דער ראש ישיבה הגאון הגדול רבי שניאור קאטלער זצ"ל, און איז באקאנט מיט זיין גדלות און גאונות בתורה, זיין אצילות און מידות טובות. ער איז א תלמיד פון הגאון הגדול רבי אליהו בער וואכטפויגל שליט"א ראש ישיבה גדולה זכרון משה סאוט פאולסבורג, און פון הגאון הגדול רבי יונתן דייוויד שליט"א ראש ישיבת פחד יצחק אין ארץ ישראל.
ביים ערשטן שיעור היינט מיטאג אינעם אלטן בית המדרש פון די ישיבה, אין די סוגיא פון תולדותיהם כיוצא בהם, האבן זיך אנגעזעהן הונדערטער תלמידי ורבני הישיבה, ובראשם די פיר ראשי הישיבה וואס זענען געקומען מיטהאלטן די המשכת השלשלת בין כותלי הישיבה.
