פארלאפענעם זונטאג כ"א אדר ב' איז פארגעקומען א גייסטרייכע מעמד ועידת "יחידי סגולה" בביתו נאוה קודש פון כ"ק אדמו"ר מצאנז שליט"א אין קרית צאנז נתני', וואו עס איז געלייגט געווארן די אבן היסוד לקראת די פארברייטערונג און פארשענערונג פון די היסטארישע צאנזער קלויז בעיר הקודש צפת.
צו די מעמד זענען געלאדנט געווארן צענדליגע נדיבים בעם, תומכים פון די צאנזע קלויז, עס איז געווען צוגערישט אויף א נאסטאלגישע פארנעם, גענוי ווי אין אלטשטאט צפת מיט הערליכע בילדער און פאכמאנישע ארבעט. הרב החסיד ר' זאב וואלף קליין הי"ו מנהל היכלי התורה והחסידות דחסידי צאנז האט אויפגעטרעטן אלס יושב ראש, און דערנאך האט אויפגעטרעטן דער נואם הכבוד הגה"צ אבד"ק לימינוב שליט"א, וועלכער איז ספעציעל געקומען צו פארן קיין ארץ ישראל באשיינען די מעמד.
אויף די מוזיקאלישע זייט האט באשיינט דער לעגענדארער בעל מנגן ר' יעקב דאסקאל הי"ו, אין באגלייטונג פון די אזמרה כאר. עס האט אויפגעטרעטן הגה"צ אבד"ק קרית צאנז טבריה שליט"א, און ווידעראמאל דער אורח הכבוד הגה"צ אבד"ק לימינוב שליט"א, דאן האט דער צאנזער רבי שליט"א געלייגט די אבן הפינה אויף א הערליכע באצירטע שטיין גענוי ווי די צאנזער קלויז אין צפת, און דערנאך האט דער רבי משמיע געווען דברות קודש.
צום שלוס פונעם מעמד האבן אלע נגידים ערהאלטן מידי קדשו פון רבי'ן א שטיין פון די היסטארישע שוהל למזכרת קודש אין א ספעציעלע האלטער.
