אלפי חסידי צאנז איבער די גארער וועלט גרייטן זיך בהכנה דרבה צו די ספעציעלע ימי אורה ושמחה, אנגעהויבן מיט די דרייסיגסטע הילולא קדישא פונעם אומפארגעסליכן רעיא מהימנא כ"ק אדמו"ר הרה"ק מצאנז קלויזענבורג זי"ע בעל שפע חיים, און צומארגנס ביום י' תמוז ווען עס וועט געפראוועט ווערן די געהויבענע שמחת החתונה פון א אייניקל ביי כ"ק אדמו"ר מצאנז שליט"א, די כלה א טאכטער פון בנו חביבו הגה"צ אבד"ק צאנז ארה"ב וראש ישיבות צאנז שליט"א.
א מאסיווע קאמפיין איז פראקלאמירט געווארן לקראת די געהויבענע ימי אורה, א מבצע אדיר אין וואס די טויזענטער חסידים וועלן מסיים זיין בצוותא חדא עטליכע מאל גאנץ ש"ס, לזכרו הטהור פונעם רבי'ן זצ"ל, די טויזענטער נשים צדקניות וועלן מסיים זיין טויזענטער מאל ספר תהלים בהתעוררות רב, און די צעירי הצאן די תינוקות של בית רבן וועלן מסיים זיין הונדערטער מסכתות הש"ס און פרקי משניות, אין לויף פון די צוויי געהויבענע טעג, יומא דהילולא רבא און יום החופה בחצר הקודש.
די מבצע מיטן נאמען "לבאי באורייתא", נעמט ארום כלל חסידי צאנז מיט א פלאם פייער פון תורה וחסידות, ווען מען וועט ממשיך זיין די הייליגע דרכים פונעם בעל ההילולא וואס האט אלע יארן געפילעוועט התמדת התורה איינמאל און נאכאמאל, די הויכפונקט וועט זיין אין סאמע ברען פון די שמחת החתונה, ווען עס וועט פארקומען די מעמדי הסיומים ברוב עם הדרת מלך, באגלייט מיט פייערליכע ריקודין לכבוד התורה ולומדיה.
אין די זעלבע צייט ווערן געמאכט די לעצטע צוגרייטונגען לקראת די יומא דהילולא קדישא, ווען טויזענטער אידן וועלן פוקד זיין דעם ציון הק' אויפן בית החיים אין שיכון ותיקים אין נתני'. די צענטראלע יארצייט טיש וואס וועט דאס יאר פארקומען בליל ההילולא זונטאג נאכט ט' תמוז, אינעם גרויסן היכל ראזענבערג אין קרית צאנז נתני', כדי צו קענען האבן גענוג צייט דערנאך צוצוגרייטן דעם זאל פאר די שמחת החתונה דינסטאג נאכמיטאג.
נאכן יארצייט טיש וועט כ"ק אדמו"ר מצאנז שליט"א פארטיילן די תעודות פאר די בחורים מצויינים ווי איינגעפירט דורכ'ן בעל ההילולא.
אין די זעלבע צייט ווערן געמאכט די צוגרייטונגען צו די געהויבענע שמחת השבע ברכות וואס וועט פארקומען למחרת החתונה, געאייגענט פאר די הונדערטער געסט וואס קומען צו פארן פון אמעריקע, זיך מיטצופרייען בשמחת רבם ומאורם, און די פערזענליכע שמחה פונעם רב הקהילה הגה"צ אבד"ק צאנז ארה"ב שליט"א.
אזוי אויך גרייט מען זיך צום שמחת האויפרוף דעם שבת קודש פרשת חוקת, וואס וועט פארקומען בעיר מגוריו פונעם חתן אין בני ברק. די שמחה וועט באשיינט ווערן דורכ'ן געהויבענעם מחותן הגה"צ אבד"ק צאנז ארה"ב שליט"א וועלכער וועט קומען פראווענען שבת אין בני ברק לכבוד די שמחה, און וועט אפרעכטן שלש סעודות שבת נאכמיטאג און דערנאך די שמחת הפארשפיל ברוב עם הדרת מלך אין זאל היכלי הפאר.
