מיט קארגע צוויי וואכן פארבליבן, גרייטן זיך טויזענטער חסידים ואנשי מעשה מיטצולעבן די גרויסארטיגע רעבישע חתונה בחצר הקודש צאנז, וואס וועט אפגעראכטן ווערן אויף א זעלטן גרויסע פארנעם במקהלות אלפי חסידים, מיט א רייע פרישע איינריכטונגען און שינויים, צו קענען אקאמאדירן דעם ריזן ערווארטעטן ציבור בליעה"ר.
די רעדע איז פון די שמחת החתונה פון א אייניקל ביי כ"ק אדמו"ר מצאנז שליט"א, די כלה א טאכטער פון זיין זון הגה"צ ר' אברהם האלבערשטאם שליט"א אבד"ק קרית צאנז טבריה, איידעם ביי כ"ק אדמו"ר מסטראפקוב שליט"א, די חתן איז א זון פונעם וועלטס משפיע הגה"צ ר' אלימלך בידערמאן שליט"א מלעלוב, איידעם ביי כ"ק אדמו"ר מזוטשקא זצ"ל.
צוליב די ריזן ערווארטעטע ציבור, סיי חסידי צאנז פון אומעטום, און סיי חסידים ומעריצים פונעם געהויבענעם אבי הכלה הגה"צ ר' אלימלך, וואס קומען צו פארן פון אלע עקן וועלט מיטצוהאלטן די שמחה במעונו, איז געמאלדן געווארן מטעם די וועד השמחה אין קרית צאנז נתני' איבער א רייע שינויים וואס ווערט צוגעגרייט דורכאויס די ימי השמחה, צו פארגרינגערן פארן ציבור און די גאנצע סדר השמחה.
די גרויסע חתונה וועט פארקומען מאנטאג פרשת בא, ה' שבט הבעל"ט בקרית מלך רב קרית צאנז נתני', אינעם ריזן היכל ראזענבערג וואס וועט פארוואנדלט ווערן אלס אכסניא של שמחה מיט נאנט צו צען טויזענט פלעצער. אין צענטער פון זאל וועט אויפגעשטעלט ווערן א גרויסע פלאטפארמע, גענוי ווי עס ווערט אויפגעשטעלט לכבוד יו"ט שמחת תורה בחצר הקודש צאנז, און אט אויף דעם פלאטפארמע וועט פארקומען די געהויבענע ריקודי קודש ביים מצוה טאנץ, ווען עמך מסביבים אותם כחומה, צו געבן די געלעגנהייט אנצופילן דעם גרויסן היכל מיט נאך טויזענטער זיץ פלעצער ביז הארט נעבן די פלאטפארמע.
פאר די טויזענטער ילדי החסידות וועט צוגעשטעלט ווערן באזונדערע מעמדים אין אלע שטעט, וואו מען וועט מיטהאלטן לעבעדיג די שמחת החתונה, און אינעם חתונה זאל וועלן נישט אריינגעלאזט ווערן קיין קינדער.
די סעודת החתונה וועט סערווירט ווערן אין באזונדערע זאלן, צו לאזן פריי די גרויסע זאל היכל ראזענבערג בלויז פאר די חסידים מיטצוהאלטן די געהויבענע מאמענטן, און נישט פארנוצן קריטיש וויכטיגע פלעצער אין זאל פאר טישן מיט עסן וכדו'. די סעודת החתונה וועט זיין צוגעשטעלט פאר די בני המשפחה אין חדר אוכל פון תלמוד תורה, פאר די געסט פון אויסלאנד אין היכל ישיבה לצעירים, און פאר די ציבור החסידים אויף די ריזיגע שטחים נעבן די בניני המוסדות.
