אין די יעצטיגע טעג איז באשטעטיגט געווארן די פלענער אויף א גרויסע מסע הקודש וואס כ"ק אדמו"ר מצאנז שליט"א וועט אונטערנעמען דעם קומענדיגן ווינטער הבעל"ט, לחון את ארצות הברית און משפיע זיין אויף תלמידיו חסידיו ומעריציו, וואס זענען אנגעבינדן באילנא דחיי מעבר לים, און קוקן ארויס אויף א געהויבענע באזוך פונעם רבי'ן שליט"א על אדמת ניו יארק.
מיט עטליכע חדשים צוריק זענען חסידי צאנז אין אמעריקע איבערראשט געווארן צו הערן אז דער רבי שליט"א נעמט אונטער א מסע הקודש קיין אמעריקע, אויפן פערזענליכן ביטע פון הגאון הגדול רבי דוב לאנדא שליט"א ראש ישיבת סלאבאדקע, וועלכער האט געבעטן דעם רבי'ן זיך אנצושליסן אין די נסיעה פון די גדולי הדור, אויפצוטרייבן גרויסע געלטער פארן קרן עולם התורה.
די הכנות צו די נסיעה איז געלאזט געווארן אין גאנג, מען האט ארויסגעדינגען א גרויסע האטעל וואו צו פראווענען א היסטארישע שבת התכנסות מיטן רבי'ן אינאיינעם, מען האט זיך געגרייט ברוחניות ובגשמיות, כינוסי הכנה און ווארעמע זיצן צו מקבל זיין דעם רבי'ן בהדרת כבוד. ליידער אבער איז אלעס צובלאזן געווארן ווען די שרעקליכע מלחמה מיט איראן איז אריין אין קראפט, און עס איז נישט געווען מעגליך אז די נסיעה זאל צושטאנד קומען אין יענעם דאטום.
אצינד איז געמאלדן געווארן אז דער רבי שליט"א האט נישט פארגעסן פון עדת צאן מרעיתו אינעם ווייטן אמעריקע, און האט באשלאסן אונטערצונעמען די מסע הקודש אין די ווינטער חדשים, משפיע צו זיין פונדערנאנט אויף די חסידים פון אמעריקע, פראווענען א גרויסע שבת און אויפנעמען די חסידים לעצה ולברכה, באזוכן אין די קהילות און מוסדות און באשיינען א רייע מעמדים בקרב קהילות הקודש דחסידי צאנז.
די מסע הקודש איז באשטימט פארצוקומען אין חודש טבת הבעל"ט, און שבת קודש פרשת שמות וועט געפראוועט ווערן א גרויסע שבת התכנסות ווען די הונדערטער חסידים פון אמעריקע וועלן ארויספארן אינאיינעם מיטן רבי'ן כשהמלך בשדה, צו וויילן ביים רבי'ן אין הויף אויפן ספעציעלן שבת אויף א נאנטע פארנעם.
