הארצרייסנדע געשריי פון כלל ישראל קעגן די ביטערע און די שווערע נסיונות וואס 'טעכנאלאגיע' ברענגט אויף דער וועלט הילכט אפ מסוף העולם ועד סופו - ספעציעלע גדרים וסייגים זיך צו פארמעסטן מיט די 'חורבנות' פון 'עי איי' אויסגעשמועסט אויפ'ן ארט - הייליגער הימל שפאלטנדער 'שמע ישראל ה' אלקינו ה' אחד' אויפ'ן ארט ברענגט אריין א רוח פון מסירות נפש אין די נאספים - שווערע געדרענג אויפ'ן ארט טראץ צוגעלייגטע פארענטשעס און מערערע גאלעריעס און שאטערס אויף דער גאס - 3 שעה'דיגע שורה פון מסירות קבלות טובות לידי המשפיע לאזט איבער פארזאמלטע מיט אייזן שטארקע און אנטשלאסענע קבלות טובות אויף להבא - ובאו כולם בברית יחד!
בני ברק. א הייליגער און לעכטיגער מעמד איז פארגעקומען דעם פארלאפענעם מוצאי שבת קודש אין דער גיגאנטישער וויזניצער שול אין דער שטאט בני ברק, ווען העכער 30 טויזנט אידן כ"י האבן זיך צוזאמגעזאמעלט אונטער איין דאך אויסצושרייען דעם געשריי אז מיר ווילן זיין און בלייבן הייליג! אז אויך אין א דור וואס איז מלא וגדוש מיט נסיונות וועלן מיר זיך שטארקן און האלטן שטארק קעגן די פגעי הטעכנאלאגיע און זיך נישט בייגן פאר איר.
"מען האט געקענט שפירן די קדושה אין דער לופט," האבן די פארזאמלטע געזאגט ארויסגייענדיג פון דעם מעמד, נאך אזא הילכיגן 'שמע ישראל' און אן אויסשריי פון ה' הוא האלקים 7 מאל בצוותא חדא מיט אזויפיל טויזנטער אידן.
לאנגע שעה'ן נאך דעם מעמד האבן נאך די פייערדיגע ווערטער געקלונגען אין די אויערן. די עמערס פון חיזוק אנצוגיין מיט דער מלחמה, אז מיר זענען נישט אליין אויפ'ן פראנט, אז מיר זענען 'רעאליסטיש' צו דעם מצב וואס פלאגט כלל ישראל און מיר פארהוילן זיך נישט פון די קרבנות וואס דער 'פגע רע' הנקרא טעכנאלאגיע האט שוין געקאסט פאר'ן כלל ישראל ביז היינט, האט געלעכערט די הערצער, ברענגענדיג יעדן באטייליגטער בגוף ובשמיעה, צו דער מסקנא אז היה לא תהיה, מיר וועלן זיך אנפאנצערן קעגן די נסיונות און זיך האלטן שטארק קעגן זיי.
טרערן פון די אויגן זענען גערינען זעענדיג ווי טויזנטער אידן שטיין נאך דער דרשה מיט די פענעס אין דער האנט זיך אנלאנענדיג אויף ווענט, אויף טירן, נאר צו קענען מאכן א כלי פון דעם שטארקן התעוררות, צו בלייבן הייליג און אפגעהיטן, זיך אונטערברומענדיג דעם 'וטהר לבנו' און 'הייליגער באשעפער מיר ווילן זיין נאנט צו דיר'.
הצילני נא ביי דער אסיפת הצלה!
וואכן און טעג פון הכנה זענען אריין לקראת דעם הייליגן מעמד אז עס זאל זיין אהערגעשטעלט בגשמיות וברוחניות און אז עס זאל איבערלאזן די גרעסטע אפעקט וואס עס איז נאר שייך ביים ציבור.
היי יאר זענען די הכנות געווען מער אויף דער לאגיסטישער פראנט. וויסנדיג פון די פריערדיגע יארן אז דער שטראם ווערט גרעסער מידי שנה בשנה, זענען די אויגן פון די עסקנים געווען געוואנדן ווי אזוי עס זאל זיין מער פלאץ, אז מער און מער מענטשן זאלן קענען מיטהאלטן די אסיפה און זיך מחזק זיין ביי דעם מעמד.
אנדערש ווי אין די פריערדיגע יארן ווען דאס געוויכט איז געווען אויף פרסום, מפרסם צו זיין די עקזיסטענץ פון דעם מעמד, האט מען דאס יאר מצמצם געווען דעם פרסום און זיך פארלייגט אויף דעם שטח. אבער טראץ די פארמינערונג אין פרסום, איז דער שטראם היי יאר איבערגעשטיגן די פריערדיגע יארן, גרייכנדיג צו אזא פאנטאסטישער צאל פון העכער 30 טויזנט אידן קע"ה.
גלייך ביים זמן מוצאי שבת קודש האט זיך אנגעהויבן דער שטראם. פון 35 שטעט אין ארץ ישראל האט מען זיך ארויסגעלאזט אנשים וטף צו זיין ביי דעם מעמד. אין א קורצער צייט איז די ריזיגע וויזניצער שול - וועלכע איז געווארן אויסגעליידיגט פון בענק און אנגעפילט מיט בענקלעך און פארענטשעס - געווארן פול עד אפס מקום פון מתאספים, אז מען האט נישט געקענט אריינלייגן קיין נאדל אין דער שול.
היי יאר האט מען צוגעלייגט אויך פארענטשעס אויף אלע פיר שטאק גאלעריען, אבער מען האט זיך נישט באגנוגנט מיט דעם. מען האט אויך צוגעבויט א שאטער אין דער גאס נעבן דעם היכל בית המדרש, און אויך אנגעגרייט דעם וויזניצער היכל הטישן אז דער ציבור זאל קענען וויילן דערין, און אין יעדן ארט איז דער שטח פול געווארן ביז געציילטע מינוטן.
עס האט זיך ארויסגעשטעלט וואס די עסקנים ווייסן שוין לאנג, אז דער דארשט פון דעם ציבור פאר חיזוק און התעלות איז גרעסער פון יעדער ערווארטונג.
א בליק ארום אין שול האט אנגעצייכנט וואס מען ווייסט שוין לאנג, אז קדושת ישראל שטייט העכער ווי יעדן קרייז אדער קהילה. אין דער שול האבן זיך געפונען פון אלערליי שיכטן און קרייזן. אנגעהויבן פון חסיד'ישע, ספרדי'שע, תימנ'ער, ירושלימ'ער, בני ברק'ער, ליטווישע, כולם נקבצו באו לך, מיטצוהאלטן דעם געהויבענעם מעמד.
אין א באזונדערן ווינקל האט זיך דערקענט די אנוועזנהייט פון גדולי הרבנים והמשפיעים שליט"א, ווי הגה"צ רבי גמליאל ראבינאוויטש שליט"א פון ירושלים, הגאון הגדול רבי שמואל אליעזר שטערן שליט"א, די קינדער פון האדמורי"ם לבית וויזניץ, תולדות אברהם יצחק, טשערנאביל און נאך, נאך דעם וואס די עסקנים האבן געבעטן אז די רבי'ס אליין זאלן נישט קומען למען סדר המעמד.
נאכצוקומען די וועלכע פארשטייען נישט קיין אידיש - די שפראך אין וואס די דרשה ווערט געגעבן, און נישט וועלנדיג נוצן טעכנאלאגישע איבערטייטש מיטלען, צו זיין אפגעשיידט פון יעדן טעכנאלאגישן מיטל, האט מען אוועקגעזעצט באותו מעמד איבערטייטשער וועלכע האבן איבערגעטייטש די שמועסן צו לשון הקודש און צו ענגליש, און די משתתפים ביים מעמד האבן געהאט מאשינקעלעך אין אויער, וואו זיי האבן געקענט הערן די דרשה איבערגעטייטשט.
'אחריות פאר כלל ישראל!'
א שטילקייט האט געהערשט אין היכל הבית מדרש ווען הגרצ"מ שליט"א האט אנגעהויבן זיין פלאמפייערדיגע דרשה. כדרכו בקודש רעדנדיג מיט א לבת אש, מיט פייער, מיט א ברען, שטיקנדיג זיך פון טרערן, האט ער א לענגערע צייט געווידמעט צו רעדן איבער דעם מצב פון כלל ישראל, צושטעלנדיג די ביטערע נסיונות אלס א רוחניות'דיגער אוישוויץ פאר כלל ישראל.
בקול בוכים האט ער פארגעליינט הארצרייסנדע בריוו פון אידן וועלכע האבן פארלוירן די בעסטע און די נאנטסטע אין דעם ביטערן נסיון, שילדערנדיג דערביי א בריוו פון א איד ווי ער וויינט אויף זיין זון וועלכער האט גרינג-געשעצט אין דעם נסיון, און היינט ווייסט זיין זון ליידער נישט פון שבת, כשרות און תפילין לייגן.
א קיצל אין הארץ האט מען געשפירט איבערזאגנדיג אז צווישן די וועלכע זענען ליידער געפאלן ביי דעם נסיון זענען דא אזעלכע וואס זייערע זיידעס זענען געשטאנען כחומה בצורה און זיך געדראפט אויף גראדע ווענט צו קענען בלייבן קעגן די קאמוניסטן, די ציוני'סטן, אבער זייערע אייניקלעך האבן זיך נעבעך אויסגעגליטשט ביי די ביטערע נסיונות פון טעכנאלאגיע.
בקול רם האט דער משפיע גערעדט איבער דער קריטישקייט פון דעם מצב, און אז אין אזא צייט זאל יעדער איד נעמען אין באטראכט די אחריות פונעם כלל, און אז נאר צוזאמען וועט מען קען באזיגן דעם שווערן נסיון, און אז יעדער איד מוז טראגן די 'אחריות' אויף כלל ישראל אז מען זאל וויסן אז מענטשן לערנען זיך אפ פון אים, און דערביי דערציילט שרעקעדיגע סיפורים ווי אזוי אידן האבן לטוב ולמוטב געדינט אלס ביישפיל פאר אנדערע.
אין יענע מינוטן האט דער משפיע שליט"א אויפגעהויבן 2 פולע אנגעשטאפטע זעקלעך מיט מער ווי 4,000 בריוו וואס איז אריינגעקומען פון אידן בלויז דעם יאר. דער משפיע שליט"א האט נישט פארגעליינט אלע בריוו, אבער ער האט יא ציטירט עטליכע הארצרייסנדע שטיקער פון זיי, וואו זיי שילדערן זייערע פערזענליכע מיטמאכענישן און איבערגאנגען נאכ'ן זיין קרבנות פון די טעכנאלאגישע חורבנות, און בעטן זיך אז מ'זאל מעורר זיין דעם ציבור דערוועגן.
דער 'חורבן' פון 'עי איי' נאך 30 יאר נסיונות פון טעכנאלאגיע!
עס האט געריסן ביים הארץ ווען דער משפיע שליט"א האט אויפגעהויבן זיינע אויגן למרום און זיך אויסגעוויינט אז נאכ'ן אריבערגיין אזעלכע נסיונות פון 30 יאר טעכנאלאגיע, האלט מען ביי 'אלף', און א פרישער נסיון שטייט ביי דער שוועל איבערשטייגנדיג אלעס וואס מען האט געוואוסט ביז היינט, דער ביטערער נסיון פון 'עי איי'.
"טאטע!" האט ער כדרכו בקודש זועק געווען למרום און זיך געבעטן אז מען זאל האבן די כוחות זיך צו דערהאלטן דערין.
פון דער אנדערער זייט האט ער אויסגערופן אז מען זאל זיך נישט מייאש זיין, און נאך יעצט, ווען עס שטייט נאך ביי דער שוועל, זאל מען צושליסן די טיר פאר אים.
מיט א ליצנותא דעבודה זרה האט ער אפגעלאכט פון דעם געדאנק אז מען איז זיך קונה אן אדון - א ראבאט, ווי אזוי מען גיט זיך איבער אין די הענט פון א גולם און מען באשטימט אים אלס מורה דרך, אז מען נעמט די הייליגסטע זאך וואס הקב"ה האט אונז געגעבן, דער שכל, און מען גיט עס איבער אין זיינע הענט.
וטהר לבנו - העכער 15 טויזנט געשריבענע קבלות טובות!
מער ווי א שעה אהאלב איז דער ציבור געזעסן געשפאנט ביים מעמד, אנווארעמנדיג די הערצער און זיך שטארקנדיג קעגן דער שווערער מלחמה וואס דער יצר הרע פירט בדורינו על ה' ועל משיחו.
דער הייליגער מעמד האט זיך געענדיגט מיט א קאפיטל תהלים פאר קדושת ישראל, און אז מען זאל זיך קענען האלטן ווייטער בקדושה ובטהרה. דער מעמד התעוררות האט נאכגעפאלגט מיט א מעמד פון זאגן 'פסוקי יחוד', ווען דער ריזן ציבור האט מקבל געווען ביחד מסירות נפש אויף לעתיד.
עס איז געווען אן ערהאבן בילד צו זען ווי אזוי נאכ'ן מעמד האבן טויזנטער גענומען די צעטלעך אין די הענט און זיך מקבל געווען קבלות טובות פאר דער חבורה פון 'אום אני חומה'.
מער ווי דריי שעה האט זיך דער ציבור געשלענגלט אין די שורות איבערצוגעבן די צעטלעך לידי המשפיע שליט"א, ווען אין דער זעלבער צייט טאנצט מען אויף די פארענטשעס, דאנקנדיג הקב"ה אויף די כוחות צו קענען בלייבן ערליך און הייליג און ערציען ערליכע דורות.
ביי דער ענדע פון דעם מעמד האט דער משפיע שליט"א מעורר געווען דעם ציבור איבער שמחה, אז נאר מיט שמחה של מצוה וועט מען מנצח זיין דעם נסיון, און א לענגערע צייט האט אנגעהאלטן די פייערדיגע ריקודין פון 'וטהר לבנו' און 'אנא עבדא דקודשא בריך הוא'.
דער מעמד האט צוגעברענגט צו א התעוררות ביי גאנץ כלל ישראל און ביי אלע באטייליגטע, און מער ווי צען טויזנט אידן האבן זיך דאס יאר אליין אנגעשלאסן אין דער חבורה פון 'אום אני חומה' צו בלייבן הייליג און אפגעשיידט פון אלערליי טעכנאלאגישע כלים.
