שווערע טויזענטער אידן צוגייען זיך אצינד ברחובות העיר ירושלים, נאך די גרויסע לוויה פון הרבנית הצדיקת הישישה מגור ע"ה, מחברתו הטהורה פון כ"ק אדמו"ר הרה"ק בעל פני מנחם זי"ע, וועלכער איז נפטר געווארן היינט מיטאג אין טיפן עלטער פון 97 יאר.
די גרויסע לוויה האט זיך אנגעהויבן ארום האלב נאך צוויי נאכמיטאג ביי איר שטוב אויף רחוב יהודה הלוי אין בני ברק, די פיר זיהן האבן געזאגט קדיש אינאיינעם, און דערנאך איז די מיטה געפירט געווארן קיין ירושלים וואו מען האט אפגעראכטן די טהרה כנהוג, דאן איז פארגעקומען די לוויה פארנט פון ישיבת שפת אמת, דארט וואו די רעבעצין האט געוואוינט פאר לאנגע יארן, שטייענדיג לימין הקודש פון איר גרויסן מאן הרה"ק דער פני מנחם זי"ע וועלכער האט פאר לאנגע יארן משמש געווען אלס ראש ישיבת שפת אמת. דארט ביי ישיבת שפת אמת האבן מספיד געווען בנה הגדול הגאון החסיד ר' יעקב מאיר אלתר שליט"א, און נכדה הגדול הגאון החסיד ר' אברהם מרדכי אלתר שליט"א, זון פון הרה"צ רבי יהודה ארי' זצ"ל.
ארום פינף אזייגער נאכמיטאג האט זיך אנגעהויבן די גרויסע לוויה פארנט פון ביהמ"ד הגדול דחסידי גור אויף רחוב ירמיהו, שווערע טויזענטער אידן זענען געווען פארזאמלט אויף די גאסן ארום אפצוגעבן דעם כבוד האחרון פארן אשת חבר כחבר, איר פלומעניק כ"ק אדמו"ר מגור שליט"א האט זיך באטייליגט ביי די לוויה פון די טעראסע בבנין ביהמ"ד הגדול, עס האט מספיד געווען בנה הגאון החסיד ר' יצחק דוד אלתר שליט"א ראה"כ להוראה דחסידי גור אין בני ברק, וועלכער האט געזאגט די קדיש דערנאך. דערנאך האבן די טויזענטער חסידים באגלייט די מיטה א שטיק וועג, ווען בראש המלווים גייט כ"ק אדמו"ר מגור שליט"א אין א קאר נאך די מיטה.
פון דארט איז די מיטה געפירט געווארן צום ביהמ"ד הגדול פני מנחם אויף רחוב יוסף זיו, וואו די הונדערטער חברי הקהילה און בני המשפחה האבן זיך פארזאמלט אפצוגעבן דעם כבוד האחרון פארן חשובן נפטרת אמה של מלכות, עס האט מספיד געווען איר גרויסן זון הגאון הגדול ראש הישיבה רבי שאול אלתר שליט"א, און דערנאך דער יונגסטער זון הגאון הגדול רבי דניאל חיים אלתר שליט"א ראש ישיבת פני מנחם. דערנאך האט מען נאכאמאל געזאגט קדיש, און באגלייט די מיטה דעם קורצן וועג ביז צום בית החיים סנהדריה, וואו די רעבעצין איז געקומען לקבורה סמוך לקברי אבותיה ומשפחתה.
די קינדער הרבנים הגאונים הצדיקים שליט"א זיצן שבעה אין בני ברק אין שטוב פון די רעבעצין ע"ה אויף רחוב יהודה הלוי 15, יעדן נאכמיטאג פון 5:00 ביז 10:00 אויפדערנאכט, און מיטוואך און דאנערשטאג די זעלבע שעות אין שטוב פון הגה"צ ר' דניאל אלתר שליט"א אויף רחוב מנחת יצחק אין ירושלים.
איר זיהן הגאון הגדול ראש הישיבה רבי שאול אלתר שליט"א וועט זיצן שבעה יעדן צופרי נאך שחרית בהיכל בית מדרשו אויף רחוב יוסף זיו, און דערנאך אין די פארמיטאג שעה'ן אינאיינעם מיטן ברודער הגה"צ ר' דניאל שליט"א אין שטוב פון הגה"צ ר' דניאל אויף רחוב מנחת יצחק.
