פון ירושלים עיר הקודש הערט מען ליידער שווערע נייעס, אז עס איז נפטר געווארן הגאון הצדיק המפורסם כ"ק גאב"ד ראדאמישלא, הגה"צ רבי יצחק ארי' לייבוש האלפערין זצ"ל, מגדולי הרבנים בארץ הקודש און רב פון די רמות ג' געגנט אין ירושלים, נאך א קורצע קראנקהייט פון בלויז צוויי טעג.
דער רב זכר צדיק לברכה איז געווען דער עלטסטער זון פון הגה"צ המפורסם רבי אלחנן האלפערין זצ"ל גאב"ד ראדאמישלא – קאשוי אין די גאלדערסגרין געגנט אין לאנדאן, און אן איידעם ביי הגה"צ המפורסם רבי שמואל אלכסנדר אונסדארפער זצ"ל גאב"ד מתיבתא ראשית חכמה אין מאנטריאל, און רב פון די צאנזער קהילה "דברי חיים" אין פתח תקוה.
דער רב זצ"ל איז געבוירן געווארן יו"ט ראש השנה תש"ה אלס עלטסטע קינד צו זיין גרויסן פאטער, ציענדיג א הערליכע יחוס למעלה בקודש, צו די הייליגע צדיקים לבית צאנז און קשאנוב, הגה"ק מהר"ש ענגיל זי"ע מראדאמישלא, די הייליגע צדיקים לבית שאץ און פרימישלאן און נאך פיל.
אלס בחור האט ער געלערנט אין די בארימטע טשעבינער ישיבה אין ירושלים, און שפעטער איז ער אריין לערנען אין די צאנזער ישיבה, וואו ער האט זיך מדבק געווען בכל נימי נפשו צו הגה"ק מצאנז קלויזענבורג זי"ע בעל שפע חיים. נאך די חתונה האט ער געוואוינט אין מאנטריאל, און דערנאך אין לאנדאן נעבן זיין שווער, שפעטער האט ער זיך געצויגן קיין ארץ ישראל וואו ער איז געווארן אויפגענומען אלס ראש הכולל "מהר"ש ענגיל" אין ירושלים, וואו זיין זון איז היינט משמש אלס ראש הכולל.
א תקופה דערויף איז דער רב זצ"ל געווארן אויפגענומען אלס רב פון די רמות ג' געגנט אין ירושלים, און אוועקגעשטעלט זיין שיינעם קהילה "אשל ברמה", אלע יארן האט דער רב מרביץ תורה געווען און משפיע געווען פאר תלמידים וחסידים, מעמיד געווען הדת על תילה און מורה געווען הלכה פאר אידישע קינדער.
די לעצטע צוויי טעג איז דער רב זצ"ל געווען פארשלאפט אין שפיטאל צוליב א אינפעקציע וואס איז געווארן שטארק קאמפליצירט, און היינט פארטאגס איז דער רב פלוצלינג נפטר געווארן לחיי העולם הבא אין עלטער פון איין און אכציג יאר. די לוויה איז פארגעקומען היינט מיטאג בבית מדרשו אין די רמות געגנט, אויפן וועג צום הר הזיתים לחלקת אבותיו הקדושים.
דער רב זצ"ל לאזט איבער א גאר חשובע דור, בנין וחתנין רבנן תלמידי חכמים מרביצי תורה, רבנים ודיינים ומורי הוראה, זיין עלטסטן זון הגה"צ רבי יחזקאל שרגא דוד האלפערין זצ"ל אבד"ק צאנז רמות, איז נפטר געווארן מיט א האלבע יאר צוריק נאכן זיך מוטשענען מיט די ביטערע מחלה ה"י, איבערלאזנדיג א דור ישרים יבורך.
די חשובע קינדער פונעם רב זצ"ל זענען ווי פאלגענד: הגה"צ רבי יעקב מאיר שמחה האלפערין שליט"א ראה"כ מהר"ש ענגיל, כ"ק אדמו"ר הרה"צ רבי נפתלי צבי האלפערין שליט"א מברעזאן, איידעם ביים שוואגער פונעם רב זצ"ל, להבחל"ח כ"ק אדמו"ר מטשערנאביל שליט"א פון ארה"ק, הגה"צ רבי מרדכי יוסף משה האלפערין שליט"א אבד"ק קהל חסידים ביתר, איידעם ביי כ"ק אדמו"ר מאמשינוב שליט"א. הגה"צ רבי חיים מתתיהו האלפערין שליט"א פון בארא פארק, איידעם ביי כ"ק אדמו"ר מטשערנאביל שליט"א פון ארה"ב, הגה"צ רבי אברהם שלמה זלמן האלפערין שליט"א, הגה"צ רבי אהרן האלפערין שליט"א, און הגה"צ רבי ברוך יהושע העשיל האלפערין שליט"א.
די חשובע איידימער זענען הגה"צ ר' יעקב מרדכי טווערסקי שליט"א אבד"ק טשערנאביל אלעד, יונגסטע זון פון הרה"ק מטשערנאביל זצ"ל, הגה"צ רבי יחזקאל שרגא ברוך האלבערשטאם שליט"א אבד"ק קרית צאנז נתני', בנו הגדול פונעם שוואגער פונעם רב זצ"ל, להבחל"ח כ"ק אדמו"ר מצאנז שליט"א, און הגה"צ ר' משה סופר שליט"א זון פון הגה"צ אבד"ק ערלוי אלעד שליט"א.
אויסער דעם האט דער רב זצ"ל פאר'אבל'ט זיין חשובע רעבעצין תבלחט"א, זיינע פיר יונגערע ברודער הרבנים הגאונים, הגה"צ רבי דוד האלפערין שליט"א גאב"ד הענדאן, הגה"צ רבי שלום יוסף האלפערין שליט"א אבד"ק ראדאמישלא ב"פ, הגה"צ רבי חיים האלפערין שליט"א אבד"ק דברי חיים אין די גאלדערסגרין געגנט אין לאנדאן, און הגה"צ רבי משה האלפערין שליט"א אבד"ק בית שמואל ראדאמישלא אין לאנדאן. זיינע שוועסטערס הרבנית הצ' מטשערנאביל תליט"א, אשת חבר כ"ק אדמו"ר מטשערנאביל שליט"א פון ארה"ק, הרבנית הצ' ממאקאווא תליט"א, אשת חבר כ"ק גאב"ד מאקאווא שליט"א, הרבנית הצ' מנדבורנא חיפה תליט"א, אשת חבר כ"ק אדמו"ר מנדבורנא חיפה שליט"א, און הרבנית הצ' מטשעבין תליט"א, אשת חבר הגה"צ רבי יוסף משה שניאורסאן שליט"א ראש ישיבת טשעבין.
בבית חותנו הגדול האט דער רב זצ"ל איבערגעלאזט חשובע שוואגער'ס, כ"ק אדמו"ר מצאנז שליט"א, כ"ק אדמו"ר מחוסט ארה"ק שליט"א, הגה"צ רבי שלמה זלמן אונסדארפער שליט"א אדמו"ר מזלאזשיץ, הגה"צ רבי יעקב אלי' אונסדארפער שליט"א גאב"ד מתיבתא ראשית חכמה אין מאנטריאל, הגה"צ רבי יוסף דוב אונסדארפער שליט"א גאב"ד מתיבתא ראשית חכמה, הגה"צ רבי ישראל אונסדארפער שליט"א מרבני צאנז קלויזענבורג, הגה"צ רבי מאיר מרדכי אונסדארפער שליט"א אבד"ק אמרי יהודה ברעזאן ב"פ, און הגה"צ רבי חיים צבי שפירא שליט"א ראב"ד קהל מחזיקי הדת בעלזא.
