מיט שווערע געמיטער ווערט אויפגענומען די ביטערע בשורה פון ארץ ישראל, אז עס איז נפטר געווארן הגה"צ רבי יעקב סופר זצ"ל אבד"ק ערלוי אין ביתר, נאך א שווערע קראנקהייט מיט וואס ער האט זיך געמוטשעט די לעצטע תקופה ל"ע.
דער רב זצ"ל איז געווען דער צווייטער זון פון כ"ק הגה"ק גאב"ד ערלוי זצ"ל בעל אמרי סופר, איינס נאכן עלטסטן זון להבחל"ח כ"ק אדמו"ר מערלוי שליט"א. ער איז אויפגעוואקסן בצל הקודש פון זיין גרויסן טאטן דער ערלויער רב זצ"ל, און געלערנט אין די בארימטע ישיבה אהל שמעון ערלוי אין די קטמון געגנט, וואו ער איז געשטיגן בדרכי התורה והיראה אויפן דרך המסורה פון זיינע חשובע עלטערן און זיידעס, ציענדיג דעם שיינעם יחוס בן אחר בן צום הייליגן חתם סופר זי"ע.
בהגיעו לפירקו איז ער געווארן אן איידעם ביי הגה"צ רבי מרדכי דאווידאוויטש זצ"ל אבד"ק בית מאיר, און מיט זיין חשובע רעבעצין תבלחט"א האט ער אויפגעשטעלט א שיינעם דור פון חשובע קינדער און אייניקלעך.
מיט יארן צוריק איז ער געווארן אויפגענומען דורך זיין טאטן הגה"ק מערלוי זצ"ל לכהן פאר אלס רב ואב"ד פון די קהילה קדושה כתב סופר ערלוי אין שטאט ביתר, וואו ער האט משפיע געווען פאר די חברי הקהילה תלמידים וחסידים פון זיין רייכן תורה קוואל.
ליידער איז ער נישט געזונט געווען די לעצטע תקופה, און די לעצטע פאר וואכן האט זיך זיין מצב הבריאות דראסטיש פארערגערט. יעצט דינסטאג פארטאגס אין ארץ ישראל איז ער נפטר געווארן לחיי העולם הבא אין עלטער פון זיבן און זיבעציג יאר, איבערלאזנדיג א הערליכע דור ישרים יבורך, די פילצאליגע תלמידים וחסידים וואס וועלן זיך בענקן נאך זיין לעכטיגע השפעה, און אלע תלמידי וחסידי ערלוי ובראשם אחיו הגדול כ"ק אדמו"ר מערלוי שליט"א, וואס באגלייטן שוין אצינד דעם צווייטן זון פון הגה"ק מערלוי זצ"ל למנוחת עולמים, נאך וואס דער פערטער זון הגה"צ ר' שמעון סופר זצ"ל אבד"ק ערלוי צפת איז נפטר געווארן מיט דריי יאר צוריק.
די מסע הלוויה וועט פארקומען מארגן דינסטאג פארמיטאג בהיכל ביהמ"ד כתב סופר ערלוי אין ביתר, און ער וועט קומען לקבורה נעבן זיין גרויסן טאטן אויפן הר המנוחות אין ירושלים עיה"ק.
דער רב זצ"ל לאזט איבער זיין עלטערן ברודער כ"ק אדמו"ר מערלוי שליט"א, זיינע יונגערע ברידער הגה"צ רבי אברהם שמואל בנימין סופר שליט"א ראש ישיבת ערלוי, הגה"צ רבי זלמן דוד סופר שליט"א אבד"ק ערלוי ב"פ, הגה"צ ר' עקיבא מנחם סופר שליט"א אבד"ק ערלוי בני ברק, און הגה"צ ר' אהרן סופר שליט"א אבד"ק ערלוי אלעד.
צווישן די חשובע קינדער וואס דער רב זצ"ל לאזט איבער נאך זיך, ציילט זיך זיין איידעם כ"ק אדמו"ר מאונגוואר שליט"א פון מודיעין עילית, און נאך חשובע מורי הוראה תלמידי חכמים און מרביצי תורה.
