די ילדי התלמוד תורה דחסידי ראחמיסטריווקא אין בארא פארק טרעטן אריין אין א געהויבענע וואך פון התרוממות הנפש, ווען דריי באזונדערע מעמדים וועט ארויפברענגען גרויס התרגשות ביי אלע קינדער, וואס וועלן זוכה זיין מיטצולעבן גייסטרייכע מאמענטן בצל הקודש פון כ"ק אדמו"ר מראחמיסטריווקא שליט"א.
די ערשטע מעמד מיטן נאמען "ואטהר ואתקדש" וועט פארקומען מארגן מאנטאג בהיכל ביהמ"ד הגדול ראחמיסטריווקא אין בארא פארק, וואו עס וועלן זיך צונויפזאמלען אלע ילדי התלמוד תורה, זיך צו מחזק זיין קעגן די נסיונות הדור, און זיך שטארקן קעגן די טעכנעלאגישע ווייען. דער באגאבטער רעדנער הרב אהרן ארי' אייזענבערג שליט"א וועט מיט זיין קול שאגת ארי אנווארעמען די יונגע הערצער, און דערנאך וועט מען הערן דעם דבר השם זו הלכה פונעם רבינ'ס איידעם הגה"צ ר' מאיר יוסף רובין שליט"א דומ"ץ ראחמיסטריווקא. אזוי אויך וועט מען זאגן אינאיינעם פרקי תהלים און מתפלל זיין פארן לעכטיגן עתיד פון די טייערע קינדער.
די צווייטע מעמד וועט פארקומען דעם קומענדיגן פרייטאג ערב שבת קודש, ווען עס וועט אין א מזל'דיגע שעה באנייעט ווערן א פרישע פליגל אינערהאלב די בנין התלמוד תורה, נאך העפטיגע בוי ארבעט וואס איז אנגעגאנגען אין די לעצטע תקופה אהערצושטעלן פרישע זעקס קלאסן צוליב די בליה און וואוקס פון די תלמוד תורה. די מעמד וועט פארקומען אין שפיץ פון כ"ק אדמו"ר מראחמיסטריווקא שליט"א וועלכער וועט קובע זיין די מזוזות און פראווענען א מסיבת לחיים ברוב עם הדרת מלך.
צוויי טעג דערויף זונטאג פר' נשא, די ערשטע טאג פון די שלושת ימי הגבלה, וועלן די ילדי הת"ת ווידער האבן די זכיה צו מקבל זיין את פני הקודש, ווען דער רבי שליט"א וועט קומען אפנעמען די קבלה צעטלעך פון די קינדערלעך, וואס זיי וועלן זיך אונטערנעמען בעניני טעכנעלאגיע נאכפאלגענדיג די מארגענדיגע כינוס.
