אינעם עיר התורה והחסידות אין מאנסי איז באנייעט געווארן א הערליכע גרויסע ישיבה געביידע, בנין ישיבת "דברי חיים" וואס געפונט זיך אויף קאלעדזש ראוד נעבן הייוויו ראוד, און איז געבויעט געווארן אויף א שנעלן אימפעט דורכאויס די לעצטע תקופה.
די באקאנטע ישיבה "דברי חיים" מיסודו ובנשיאותו פון הגה"צ ר' צבי הירש ראבינאוויטש שליט"א אבד"ק באבוב 45 מאנסי, האלט שוין אצינד איבער דרייצן יאר זינט די התייסדות, ווען די כתר שם טוב איז גאר שטארק און פון איבער די גאנצע וועלט וואונטשט מען זיך צו לערנען אין די ישיבה, א מקום תורה וואס באשטייט פון נאנט צו דריי הונדערט תלמידים וואס זיצן און הארעווען בתורה ועבודה.
נאכן זיין אין פארשידענע געדונגענע לאקאלן דורכאויס די יארן, איז מען ענדליך אנגעקומען אצינד אל המנוחה ואל הנחלה, מיטן באנייאונג פונעם אייגענעם בנין הישיבה "בנין ראזענבערג" בנדבת לבו פון הנגיד החסיד ר' אברהם יודא ראזענבערג הי"ו. די ישיבה גדולה האט זיך אריינגעצויגן דעם אנהייב זמן אויף א רויע פארנעם, אין די צייט וואס די דארמיטארי איז אריין אין באנוץ צו די יעצטיגע ימי החנוכה, און די ישיבה קטנה איז ערווארטעט זיך אריינצוציען אין די נייע געביידע אין עטליכע וואכן ארום.
פארגאנגענעם דאנערשטאג פרשת וישב איז פארגעקומען א גרויסע מעמד קביעת מזוזה ומסיבת לחיים אינעם היכל הישיבה, וואו עס האט זיך באטייליגט בראש המסובים כ"ק אדמו"ר מדינוב שליט"א, פאטער פונעם ראש ישיבה אבד"ק באבוב 45, און דער נדבן הבנין הנגיד ר' אברהם יודא ראזענבערג הי"ו.
