פון חצר הקודש ראחמיסטריווקא אין ספרינג וואלי איז היינט געמאלדן געווארן אז דעם קומענדיגן ליל ל"ג בעומר מוצאי שבת קודש פרשת בהר, וועט דער רבי שליט"א אנצינדן די הדלקה לכבוד התנא האלקי רבי שמעון בר יוחאי, ברוב עם הדרת מלך ברחובה של עיר פארנט פון ביהמ"ד.
דער רבי שליט"א וועלכער האט אנגענומען די כתר האדמורו"ת דעם ווינטער, איז נעתר געווארן צו די בקשה פון די חסידים וועלכע פלעגן מאכן א הדלקה אויב ל"ג בעומר איז אויסגעפאלן מוצאי שבת, אזוי אויך איז דער רבי שליט"א ווי באקאנט אויפגעוואקסן אין ארץ ישראל, וואו די מנהג קודש פון מאכן א הדלקה ל"ג בעומר איז געווען איינגעפירט אין אלע רעבישע הויפן.
די גרויסע מעמד ההדלקה וועט פארקומען ברחובה של עיר אויף ווארען קאורט פארנט פון ראחמיסטריווקא בית המדרש, און די עסקנים זיצן אינאיינעם מיט די שטאטישע עסקנים צו אויסצוארבעטן אלע טעכנישע דעטאלן, דירעקטירן טראפיק און פארקינג און דאס גלייכן.
תיכף נאך די הדלקה וועט דער רבי שליט"א מעריך זיין שולחנו הטהור לכבוד היום אין היכל בית המדרש, אינאיינעם מיט חותנו הגדול כ"ק הגה"צ אבד"ק ראחמיסטריווקא שליט"א, און זונטאג ל"ג בעומר אינדערפרי נאך שחרית וועט פארקומען די מעמדי החאלאקעס אין ביהמ"ד.
