חסידי ראחמיסטריווקא אין ארץ ישראל גרייטן זיך בהכנה דרבה צו מקבל פנים זיין דעם חשובן גאסט כ"ק אדמו"ר מראחמיסטריווקא שליט"א פון ספרינג וואלי, וועלכער נעמט אונטער א געהויבענע נסיעה קיין ארץ ישראל צו באשיינען עטליכע משפחה שמחות, און צום ערשטן מאל נאכן איבערנעמען די כתר האדמורו"ת וועט דער רבי פראווענען א שבת אין ארץ הקודש.
דער רבי שליט"א וועט ארויספארן קומענדיגן זונטאג פרשת כי תצא, דורכאויס די וואך וועט דער רבי זיך אויפהאלטן אין ירושלים עיר הקודש, בבית אמו הרבנית תליט"א, און פוקד זיין די מקומות הקדושים לענגאויס ארץ ישראל, און באזוכן בבתי אדמורי"ם ורבנים.
דינסטאג פרשת כי תצא וועט דער רבי מפאר זיין בראש השמחה ביי די חתונה בבית אחיו הגה"צ ר' פנחס אהרן טווערסקי שליט"א, וואס די כלה איז עטליכע מאל א אייניקל פון כ"ק אדמו"ר הרה"ק רבי יוחנן מראחמיסטריווקא זי"ע, מיטן חתן א זון פון הגה"צ ר' ישעי' טווערסקי שליט"א מלויעוו טשערנאביל.
שבת קודש וועט געפראוועט ווערן אויף א גרויסע פארנעם אין שטאט בית שמש, אינאיינעם מיט די שמחת השבע ברכות בבית אחיו, עסקני קהילה קדושה ראחמיסטריווקא אין ארץ ישראל זענען שטארק אקטיוו די טעג אויסצוארבעטן א פאסיגע לאקאל וואו דער רבי זאל קענען אפרעכטן די תפילות און טישן ברוב עם, צו אין א גרויסע שאטער אדער אין א גרויסע זאל.
מאנטאג פרשת כי תבוא וועט דער רבי באשיינען די שמחת החתונה בבית גיסו הגה"צ ר' אהרן טווערסקי שליט"א אב"ד טשערנאביל ירושלים, בן כ"ק אדמו"ר מטשערנאביל שליט"א, מיט די חתן א אייניקל פון כ"ק אדמו"ר מוויזניץ שליט"א, די חתונה קומט פאר אין ביהמ"ד הגדול אין קרית וויזניץ בני ברק. און צומארגנס דינסטאג וועט דער רבי זיך ארויסלאזן אויפן וועג צוריק קיין ניו יארק.
