דעם אנהייב נאכט איז אנגעקומען די ביטערע בשורה איבער די פטירה פון הגה"צ ר' אהרן זאב מאליק זצ"ל רב דקהל סאמבור אין וויליאמסבורג, וועלכער איז ליידער קריטיש פארוואונדעט געווארן אין א קאר עקסידענט מיט עטליכע חדשים צוריק.
דער רב זצ"ל איז געווען א זון פון הרב החסיד ר' בנציון מאליק ז"ל, און א איידעם ביי הרב החסיד ר' יוסף סאקס ז"ל מחשובי חסידי סאטמאר אין וויליאמסבורג, זיין שווער ר' יוסף איז געווען א איידעם ביי הרב החסיד ר' יחיאל אלטר שטיינבערג ז"ל, און א שוואגער מיט כ"ק אדמו"ר מזידטשויב זצ"ל, און הגה"צ אבד"ק באלטימאר זצ"ל. למעלה בקודש האט ער געצויגן א הערליכע יחוס צו הרה"ק רבי מאיר'ל פרימישלאנער זי"ע, הרה"ק דער זלאטשובער מגיד זי"ע, און הרה"ק רבי משה מסאמבור זי"ע.
מיט יארן צוריק האט דער רב מייסד געווען בית מדרשו לתורה ולתפילה, די סאמבורע שוהל קהל אהרן זאב אויף וואלאבאוט איז געווען א צענטער פאר תורה וחסידות, וואו דער רב האט משפיע געווען מהודו והדרו אויף אלע מתפללים וחברי הקהילה.
עטליכע חדשים צוריק איז דער רב ליידער קריטיש פארוואונדעט געווארן אין א שרעקליכע עקסידענט אויף די ניו יארק סטעיט טרואוועי, ער איז דאן אריינגעפאלן אין א קאומא פון וואס ער האט זיך ליידער נישט ערוועקט ה"י, און דעם אנהייב נאכט איז ער נפטר געווארן לחיי העולם הבא אין עלטער פון זעקס און זיבעציג יאר, איבערלאזנדיג א הערליכע דור בליעה"ר, קינדער און אייניקלעך זרע ברך ה'.
די לוויה קומט פאר יעצט פארמיטאג בהיכל בית מדרשו אויף 205 וואלאבאוט, און שפעטער ארום איינס אזייגער מיטאג וועט פארקומען די לוויה אויפן בית החיים אין קרית יואל וואו ער וועט קומען לקבורה.
