דעם מוצאי שבת קודש איז געמאלדן געווארן דורך די הנהלה פון מוסדות פאפא, איבער א פרישע אונטערנעמונג וואס איז געלאזט געווארן אין גאנג, אהערצושטעלן ביליגע זאלן פאר די חברי הקהילה, צו קענען חתונה מאכן מיט א רואיגקייט מיט הרחבת הדעת.
ביים יערליכן מלוה מלכה אין קאנטינענטאל זאל אין וויליאמסבורג, מיטן אנוועזנהייט פונעם נשיא המוסדות כ"ק אדמו"ר מפאפא שליט"א, נאכן אויסרעכענען פארשידענע דערגרייכונגען אין די מוסדות הקדושים דורכאויס די לעצטע תקופה, האט דער ענערגישער מנהל המוסדות הרה"ח ר' יואל פריעדמאן הי"ו געמאלדן מיט פרייד, אז די הנהלת המוסדות ארבעט אויף א פראיעקט אהערצושטעלן די באקאנטע "כתר צבי" זאל, צו קענען דארט חתונה מאכן אויף א ביליגע פארנעם.
אין די בנין המוסדות אויף ווילסאן איז איינקוואטירט צוויי שמחה זאלן, "כתר ריזל" וואס דינט אלס חתונה זאל, און "כתר צבי" וואס איז עטוואס קלענער, און ווערט אצינד גענוצט בלויז אויף קלענערע שמחות. אצינד טוט די הנהלת המוסדות ארבעטן אויף א מעגליכקייט אהערצושטעלן אויך די כתר צבי זאל צו קענען דארט אפרעכטן חתונות, און עס וועט ווערן צוגעשטעלט פאר א ספעציעלע ביליגע פרייז מיט ביליגע אנגעלעגנהייטן ארום, די דעטאלן ווערן נאך אויסגעארבעט, מיטן האפענונג אז עס וועט אריינגיין אין קראפט צום קומענדיגן יאר.
דאס זעלבע ווערט אויסגעארבעט פאר די נייע זאלן בבנין תלמוד תורה החדש דחסידי פאפא אין בארא פארק, וואס ווערט אצינד פארענדיגט מיט פראכט, נאך וואס די תלמידי התלמוד תורה האבן זיך שוין אריינגעצויגן אינעם נייעם בנין בשעטו"מ. די הנהלת המוסדות לייגט אריין ספעציעלע ארבעט צו קענען ארויסדינגען דעם זאל פאר א ביליגע פרייז מיט ספעציעלע טערמינען, צו קענען ארויסהעלפן די חברי הקהילה חתונה צו מאכן די קינדער מיט הרחבת הדעת.
