בחצר הקודש באבוב 45 גרייט מען זיך אין די יעצטיגע טעג צו א היסטארישע און באדייטענפולע שמחה, ווען עס וועט געפראוועט ווערן די שמחת החתונה פון א אייניקל ביי כ"ק אדמו"ר מבאבוב 45 שליט"א, און וועט צום ערשטן מאל געפראוועט ווערן בתוככי בית המדרש הגדול והחדש, מרכז העולמי באבוב 45, וואס איז נארוואס באנייעט געווארן אין א מזל'דיגע שעה צום היי יעריגן ירח האיתנים.
די כלה איז א טאכטער פונעם רבינ'ס עלטסטן איידעם הגה"צ ר' חיים ברוך האלבערשטאם שליט"א, זון פון הגה"צ ר' בנציון אברהם האלבערשטאם שליט"א אבד"ק בית אברהם פאקשעוויץ, די חתן איז א זון פון הגה"צ ר' יהושע פרץ הורוויץ שליט"א, זון פון הגה"צ אבד"ק זרע קודש וראש ישיבת בית מאיר שליט"א, און איידעם ביי הגה"צ ר' ישעי' תאומים פרענקל שליט"א רב דקהל קדושי קראקא בני ברק.
צענדליגע עסקנים ארבעטן די טעג אויסצושטעלן אלע דעטאלן, סיי צו קענען אריינשטעלן די מאקסימום פלעצער און די הויכשטאקיגע פארענטשעס אינעם היכל בית המדרש, און סיי מיט די סעודת החתונה וואס וועט סערווירט ווערן בהרחבה אין פילע אפטיילונגען פונעם בנין ביהמ"ד, און פאר די נשים אין זאל פון כרם מנחם.
די מעמד החופה וועט פארקומען ברחובה של עיר אויף די פערצנטע עוועניו אין בארא פארק, הארט נעבן די בנין ביהמ"ד וואס געפונט זיך ביים ווינקל פון די ניין און פערציגסטע סטריט. אזוי אויך וועלן זיין פילע שינויים אין די סדרי החתונה, אנדערש ווי ביי די ביז יעצטיגע חתונות אינעם רבינ'ס הויף, צוליב דעם ריזן ציבור וואס איז ערווארטעט זיך משתתף צו זיין מהחל ועד כלה.
