בחצר הקודש תולדות אהרן גרייט מען זיך אצינד צו א זעלטן רייכע מעמד "ועידת המייסדים", אין באצוג צו די מאסיווע פארשריט אויפצובויען די נייע גיגאנטישע בית המדרש הגדול פאר חסידי תולדות אהרן בעיר השם שמה, ירושלים עיר הקודש תבנה ותכונן.
מיט בערך א יאר צוריק האט זיך אנגעהויבן וועבן די ערשטע פלענער אויפצובויען א נייע גיגאנטישע בנין בית המדרש נאך די מאסיווע בליה און וואוקס פון די צאל חסידים ואנשי מעשה. אצינד האלט מען שוין היבש נאנט צו די פאקטישע בוי ארבעט, דעטאלירטע פלענער איז שוין פארהאן מיטן הילף פון דער מייסטער ארכיטעקט ר' אהרן עסטרייכער הי"ו פון ירושלים, און די הנהלת הקהילה זוכט שוין נאך א פאסיגע ארט וואו צו איינקוואטירן די בית המדרש אויף א צייטווייליגע פארנעם פאר די קומענדיגע פאר יאר.
על פי קריאת הקודש פון כ"ק אדמו"ר מתולדות אהרן שליט"א איז אוועקגעשטעלט געווארן א ספעציעלע קאמפיין מיטן נאמען "המייסדים", אין וואס די געטרייע חסידים שליסן זיך אן צו זיין פון די מייסדים, אוועקצושטעלן די נייע בית המדרש לשם ולתפארת, דערצו איז באשטימט געווארן אז דעם קומענדיגן זונטאג פרשת בלק ח' תמוז וועט פארקומען א זעלטן רייכע מעמד וואו די הונדערטער חסידים תומכי ממלכת הקודש די מייסדים וועלן מיסב זיין על שולחן מלכים.
די גרויסע מעמד וועט פארקומען אין די פראכטפולע "די סיטי" זאלן בגלילות עיר הקודש ירושלים, עלעגאנטע איינלאדענונגען זענען געשיקט געווארן צו אלע חסידים וואס שליסן זיך אן אלס מייסדים, אין א מבצע וואס מען האפט אויפצוטרייבן גאנצע צוואנציג מיליאן שקל! אלס יושב ראש המעמד וועט דינען דער באגאבטער רעדנער און פה מפיק מרגליות פון אמעריקע, הרב החסיד ר' מאיר מרדכי בערקאוויטש הי"ו, און די מעמד וועט ווערן באגלייט דורך פארמאנישע כלי נגינה אין שפיץ פון די מלכות קאפעליע, און דער בארימטער בדחן און בעל מנגן ר' ישראל אדלער הי"ו.
דורכאויס די מעמד וועט פארקומען א ספעציעלע פאנעל מיטן מייסטער ארכיטעקט ר' אהרן עסטרייכער הי"ו, וועלכער וועט שילדערן די גענויע פלענער און דעטאלן פון די נייע גיגאנטישע בנין בית המדרש וואס איז ערווארטעט צו ווערן א פאקט אין די קומענדיגע פאר יאר, די נייע היכל וועט אנהאלטן דריי טויזענט זיץ פלעצער, און נאך פיר שטאק גאלעריעס מיט טויזענטער פלעצער.
