קומענדיגע וואך איז כ"ק אדמו"ר מתולדות אהרן שליט"א ערווארטעט אנצוקומען אויף א לענגערע באזוך אין ניו יארק, לקראת די שמחת החתונה פון א אייניקל וואס קומט פאר אין קרית יואל, און אין די זעלבע צייט אויפטרייבן שטיצע ווי יעדעס יאר, למען החזקת מוסדותיו הקדושים בארץ הקודש על טהרת הקודש.
דער רבי איז ערווארטעט ארויסצופארן קיין ניו יארק קומענדיגע וואך מאנטאג פרשת וירא, די ערשטע פאר טעג פון די באזוך וועט דער רבי זיך אויפהאלטן אין לאורענס, בבית האכסניא אין שטוב פון הנגיד החסיד ר' זאב בעער הי"ו, און ארויפגיין דארט לבתי נגידים ושועים וואו עס וועט פארקומען א רייע רייכע מסיבות לטובת מוסדות תולדות אהרן.
שבת קודש פרשת וירא וועט פארקומען א גרויסארטיגע שבת התאחדות מיט כלל חסידי תולדות אהרן בארה"ב, אינאיינעם מיט די געהויבענע שבת של שמחה בצל הקודש, שמחת האויפרוף פונעם רבינ'ס אייניקל. די שבת וועט געפראוועט ווערן אין די פראכטפולע שאלעי האטעל אין וואודבארן, וואס איז שוין מערערע מאל פארוואנדלט געווארן אלס אכסניא של תורה פאר א שבת התוועדות פון חסידי תולדות אהרן אין שפיץ פון רבי'ן.
נאך שבת וועט דער רבי ארויספארן קיין קרית יואל און דארט וויילן פאר עטליכע טעג, דינסטאג פרשת חיי שרה וועט פארקומען אין קרית יואל די געהויבענע שמחת החתונה פונעם רבינ'ס אייניקל, די חתן א זון פון זיין איידעם הגה"צ ר' אליהו גינזבערג שליט"א זון פון כ"ק אדמו"ר מחוסט שליט"א, מיט די כלה א טאכטער פון הגה"צ ר' משה טייטלבוים שליט"א רב ביהמ"ד בית שמואל בנימין אין קרית יואל, איידעם ביי הגה"צ ר' געציל בערקאוויטש שליט"א דומ"ץ קרית יואל ובעל אגלי דבש.
נאך די חתונה וועט דער רבי אנקומען קיין מאנסי, וואו דער רבי וועט פראווענען די נאכפאלגענדע דריי שבתים, פרשת חיי שרה, פרשת תולדות, און פרשת ויצא, דורכאויס די וואכן טעג פון פרשת תולדות וועט דער רבי וויילן אין לעיקוואד לטובת די מוסדות, דורכאויס די וואכן טעג פון פרשת ויצא וועט דער רבי וויילן אין בארא פארק לטובת די מוסדות, און אנהייב וואך פרשת וישלח וועט דער רבי וויילן אין וויליאמסבורג, ביז מיטוואך ווען דער רבי שליט"א וועט זיך אומקערן למעון קדשו אין ירושלים עיה"ק.
