מארגן מיטוואך ערב ראש חודש שבט, וועט פארקומען א גרויסארטיגע מעמד עצרת תפלה והתעוררות ביים קבר פון שמואל הנביא אין ירושלים עיה"ק, אויפן פערזענליכע רוף פון כ"ק אדמו"ר מפינסק קארלין שליט"א, וועלכער זאמלט איין כל הקהל הקודש זקנים עם נערים, צו מתפלל זיין לישועת הכלל והפרט מיט א כח הרבים.
אין א מכתב קודש וואס דער רבי שליט"א האט אפגעשריבן פארגאנגענע וואך צו די חסידים, בעט דער רבי אז מען זאל זיך קומען באטייליגן ביים עצרת תפלה והתעוררות און פועל'ן ישועות פאר אידישע קינדער, נאך וואס מען הערט ליידער שווערע צרות און תלאות וואס באטרעפט אידישע קינדער איבער די וועלט, און עס האט ליידער נישט איבערגעהיפט די קהילה קדושה פינסק קארלין וואס האט אויך געליטן פון פארשידענע צרות רח"ל.
די גרויסע עצרת תפלה וועט פארקומען ביים ציון הק' פון שמואל הנביא אין ירושלים עיה"ק, אנגעהויבן מיט תפילת מעריב, און דערנאך פרקי תהלים און ספעציעלע תפילות. דערנאך וועט פארקומען א גרויסע סעודת ראש חודש אין שפיץ פונעם רבי'ן אין די טשעכנובער זאל אין ירושלים, וואו דער רבי וועט משמיע זיין דברות קודש און דברי חיזוק פאר די חסידים, און אויפן רבינ'ס בקשה וועלן אויך די פרויען און קינדער מיטהאלטן דעם מעמד דורכן טעלעפאן, צו זיין א טייל פון דעם כנסיה לשם שמים.
