פארגאנגענעם שבת קודש פרשת וישב שטייענדיג הארט פאר די ימי החנוכה, האט כ"ק אדמו"ר מבאבוב שליט"א אויפגעטרעטן מיט שטארקע דברות קודש איבער די היינטיגע סארט מגושמ'דיגע חנוכה מסיבות און וואכנאכטס, וואס ווערט ליידער אפגעראכטן אין פילע פעלער אויף א פראסטע פארנעם.
דער רבי שליט"א האט דערמאנט די רמב"ם אז יעדער מענטש ווערט נשפע פון זיין סביבה, און די געוואלדיגע מעלות וואס קומט דערפון זיך אפצולערנען פון גוטע אידן, דער רבי האט ערווענט אז ליידער זעהט מען היינט אז מענטשן לערנען זיך אפ בלויז פון שלעכטע זאכן, און די סביבה ברענגט בלויז שאדן בגוף ובנפש.
דער רבי האט דערמאנט דאס וואס מען זעהט לעצטנס ביי וואכנאכטס, זאגענדיג אז אמאל פלעגט מען מאכן א קליינע לחיים אין שטוב, אבער היינט מאכט מען שוין א גאנצע פארטי, מיט מוזיקאלישע געזאנג אין א גרויסע זאל, מען רופט נאך פרויען צו די זייט, וואס באמת האבן פרויען נישט וואס צו זוכן ביי א וואכנאכט. מען שטעלט צו עסן אויף א מגושמ'דיגע אופן, מיט וויין און נאך פארשידענע נישט אידישע מנהגים, עפעס וואס איז בכלל נישט וואס א וואכנאכט באדייט.
דאס זעלבע איז מיט חנוכה מסיבות וואס אויף דעם קען מען זיך אויסדרוקן "צדיקים ילכו בם ופושעים יכשלו בם", און עס איז די אחריות פון די עלטערן צו שטיין על המשמר, צו זיכער מאכן אז די מסיבות ווערן אפגעראכטן אויפן ריכטיגן פארנעם, עס זאל ברענגען בלויז א רוחניות'דיגע תועלת. דער רבי האט דערמאנט אז די סעודה דארף זיין אזוי ערליך, אז דעם ניגון ופיוט "אודה לקל" זאל זיך טרעפן דארט דאס פלאץ, און עס איז טאקע כדאי עס צו זינגען וויבאלד עס איז מעורר נישט צו פארשמירן די נשמה, און אזוי אויך איז עס אן הודאה לה' וואס איז ענינא דיומא אינעם יום טוב פון להודות ולהלל.
דערנאך האט דער רב ארומגערעדט איבער די גרויסקייט פון די תפילות חנוכה, די הלל, דאס בענטשן, און וויאזוי חסידישע אידן רעכטן אפ ליכטיגע ימי חנוכה.
