א פייער וואס האט אויסגעבראכן נעכטן ביינאכט אין א באוואוינטע געביידע אין בארא פארק, האט אנגעברענגט שאדן פאר די באיאנער חדר וואס איז סטאנציאנירט אינעם זעלבן געביידע.
די פייער האט פאסירט ארום צען אזייגער ביינאכט אין די געביידע אויף די צוועלפטע עוועניו, ביים ווינקל פון די פיר און פערציגסטע סטריט, די געביידע פון עטליכע שטאק דינט אלס אכסניא של תורה פאר תלמוד תורה תפארת מרדכי שלמה דחסידי באיאן, און אזוי אויך איז פארהאן דארט עטליכע דירות פאר משפחות.
די פייער האט אויסגעבראכן אויף די פערטע שטאק, און איין פייערלעשער איז פארוואונדעט געווארן ביים פרובירן צו באקעמפן די פלאמען, צוליב די שווערע שאדן איז די בנין דערווייל נישט אין באנוץ, און די תלמוד תורה האט זיך איינקוואטירט אויף צייטווייליג אין די בנין פון תלמוד תורה באבוב אויף די אכט און פערציגסטע סטריט.
