אין די צייט וואס עס האט זיך געשלאסן א העכסט געלונגענע מסע הקודש וואס כ"ק אדמו"ר מאלכסנדר שליט"א האט אונטערגענומען קיין ניו יארק, אויפצוטרייבן פאנטאסטישע סכומים צו פינאנצירן די מאסיווע בוי פראיעקט אויפצובויען די נייע בנין ביהמ"ד הגדול דחסידי אלכסנדר אין בני ברק, איז היינט דינסטאג פארגעקומען שטארקע פארשריט אויפן שטח הבניה, ווען די אלטע בנין בית המדרש איז צעווארפן געווארן צו גרייט מאכן דעם שטח פאר א שפאגל נייע בנין.
היסטאריע האט זיך געשלאסן דעם היינטיגן טאג, שליסנדיג א קאפיטל פון צענדליגע יארן וואס צדיקי בית אלכסנדר האבן געפראוועט די עבודת הקודש אין דעם אלטן בית המדרש, א מקום תורה ותפילה וואו אידישע קינדער האבן געדינט דעם אויבערשטן העכער א יובל יארן כולן שוין לטובה.
איידער דער רבי איז ארויסגעפארן קיין ניו יארק, איז פארגעקומען א ספעציעלע מעמד ערב שבת קודש פרשת נח, ווען עס איז באנייעט געווארן א צייטווייליגע לאקאל פארן ביהמ"ד אין די בנין הישיבה דחסידי אלכסנדר, וואו מען דאווענען ביז די נייע ביהמ"ד ווערט פארטיג. בתופים ובמחולות האט מען באגלייט די ספרי תורה פונעם אלטן ביהמ"ד צו די נייע, ווען אין שפיץ פון די תהלוכה שפאנט כ"ק אדמו"ר מאלכסנדר שליט"א מיט גרויס התרגשות.
