צענדליגע טויזענטער אידן האבן זיך היינט פארזאמלט ברחובות העיר בארא פארק, אפצוגעבן דעם כבוד האחרון פארן שריד לדור דעה, זקן רבני העיר, כ"ק המשגיח הגה"צ אבד"ק אמונת ישראל זצוק"ל, וועלכער איז דעם מוצאי שבת נסתלק געווארן לגנזי מרומים בשיבה טובה, אין טיפן עלטער פון ניין און ניינציג יאר.
ארום צוויי אזייגער פארטאגס איז די מיטה אריינגעברענגט געווארן בבית מדרשו של רבי, אין ביהמ"ד הגדול דקהל אמונת ישראל אויף די זעכצנטע עוועניו, וואו פילע אידן האבן זיך פארזאמלט צו זיך געזעגענען און זאגן תהלים מיט בכיות נוראות. ארום זיבן אזייגער אינדערפרי האט מען ארויסגעפירט די מיטה אויפן וועג קיין שיכון סקווירא, וואו עס איז דורכגעפירט געווארן די טהרה אין די ארטיגע טהרה שטיבל.
דערנאך ארום ניין אזייגער איז פארגעקומען די לוויה פארנט פון ביהמ"ד הגדול אין שיכון סקווירא, במקהלות אלפי חסידי סקווירא ובראשם כ"ק אדמו"ר מסקווירא שליט"א, הגה"צ ר' יוסף ישראל אייזענבערגער שליט"א דומ"ץ שיכון סקווירא האט פארגעזאגט קל מלא רחמים, און דערנאך האט דער פילקעפיגער ציבור אין שפיץ פון רבי'ן באגלייט די מיטה ארויף די גאס ביז צום ארויסגאנג פון שטעטל.
ארום צען דרייסיג איז די מיטה אנגעקומען פארנט פון ישיבה ומתיבתא תורה ודעת אין פלעטבוש, וואו עס זענען געווען פארזאמלט הונדערטער אידן תלמידים ומעריצים, באותו מקום וואו דער משגיח האט מרביץ תורה געווען רבות בשנים. הרה"ג ר' אלי' כ"ץ שליט"א מראשי הישיבה האט פארגעזאגט תהלים מיט גרויס התעוררות, שיר המעלות ממעמקים פסוק בפסוק.
פון דארט איז די מיטה געברענגט געווארן לביתו נאוה קודש פונעם משגיח זצ"ל, וואו די בני המשפחה האבן זיך געזעגנט א שטיק צייט. האלב נאך עלף איז די מיטה אריינגעברענגט געווארן בהיכל ביהמ"ד הגדול אמונת ישראל, וואו דער פילקעפיגער ציבור האט אויסגעבראכן אין א שרעקליכע געוויין קלאגענדיג אויף די שרעקליכע אבידה שאין לה תמורה. צוערשט האט הרב שלמה לעזער הי"ו מנכבדי הקהילה פארגעזאגט קאפיטל מכתם לדוד, עס האבן מספיד געווען די חשובע איידימער פונעם משגיח זצ"ל, הרה"ג ר' חיים ראזענבערג שליט"א ראש ישיבת שערי יושר, כ"ק אדמו"ר מתולדות יהודה סטוטשין שליט"א, הרה"ג ר' גדלי' מאכליס שליט"א ראש כולל חסידי קארלין סטאלין אין בארא פארק, הגה"צ רבי שמואל יהודה זילבער שליט"א אבד"ק אמונת ישראל, נכדו חביבו פונעם גרויסן נפטר דער משגיח זצ"ל, און הרה"ג ר' שמואל דוד הארדט שליט"א רב קהל אמונת ישראל אין שטאט ביתר.
דערנאך האט הרה"ח ר' שלמה לעזער הי"ו מנכבדי העדה אויסגערופן די צוואה פונעם גרויסן נפטר זצ"ל איבער די המשך ההנהגה, בנו חביבו הרה"ג ר' אברהם יצחק וואלפסאן שליט"א זאל איבערנומען די כתר ההנהגה אין קהל אמונת ישראל אין מאנסי ווי ביז היינט, און נכדו חביבו הרה"ג ר' שמואל יהודה זילבער שליט"א זאל איבערנעמען די כתר ההנהגה אין קהל אמונת ישראל אין בארא פארק.
דער נייער רב הרה"ג ר' שמואל יהודה זילבער שליט"א איז דער עלטסטער זון פון כ"ק אדמו"ר מתולדות יהודה סטוטשין שליט"א, און איידעם ביי כ"ק אדמו"ר מסערדאהעלי שליט"א. ער האט גענאסן א אויסטערלישע חביבות ביים גרויסן זיידן דער משגיח זצ"ל, וועלכער האט אים ממנה געווען אלס דיין און מורה צדק פון די קהילה. היינט אויפדערנאכט קומט פאר אין מאנסי די גרויסע חתונה פונעם חתן א זון פונעם נייעם רב שליט"א, מיט די באטייליגונג פון הונדערטער חסידים ואנשי מעשה.
צום שלוס האט הרה"ג ר' ברוך בער אונגארישער שליט"א מנכבדי העדה, א זון פון הרה"ג ר' דן אונגארישער זצ"ל ראש ישיבת בית מדרש עליון, פארגעזאגט קל מלא רחמים מיט גרויסע בכיות. און דאן האט מען ארויסבאגלייט די מיטה לרחובה של עיר, אראפ ביז די אכט און דרייסיגסטע סטריט.
ביי די גרויסע לוויה האבן זיך באטייליגט כ"ק האדמורי"ם מבאבוב, באבוב 45, סקולען, צאנז קלויזענבורג, בית חיים יהושע, טשערנאביל, ראחמיסטריווקא, וויזניץ ירושלים, וויען, לעלוב, קאסאן, ראחמיסטריווקא מאנסי, ראחמיסטריווקא וויליאמסבורג, ראחמיסטריווקא ס"וו, זוועהיל ארה"ב, סקווירא ב"פ, ווערדאן פון ב"פ, גארליץ, פאפא ב"פ, אלעסק, זידטשויב באר שבע, באסטאן ב"פ, ראפשיץ, בלאזוב, בלאזוב ריבאטיטש, ספינקא מאנסי, דאמבראווא, רימנוב, הרה"ג ר' שלום רוקח שליט"א נכדו הגדול פון כ"ק אדמו"ר מבעלזא שליט"א, גאב"ד טענקא, הגאון הגדול רבי דוד שוסטאל שליט"א ראש ישיבה בית מדרש גבוה ד'לעיקוואד, דומ"ץ טאהש ב"פ, הרה"ג ר' אברהם חיים שטיינווארצל אב"ד מטה אפרים ור"י שערי יושר, אב"ד זרע קודש וראש ישיבת בית מאיר, הגה"צ דומ"ץ סאטמאר ב"פ, הגה"צ ר' בנימין אייזענבערגער אב"ד היכל התפילה, הגה"צ ר' יעקב ברוך לעדעררייך שליט"א אב"ד קארלין סטאלין ב"פ, הגה"צ ר' רפאל שארר שליט"א אב"ד תפארת גדלי' וראש ישיבת וויזניץ, הגה"צ אבד"ק סלאנים מאנסי שליט"א, הרה"ג ר' בנימין ברייער שליט"א דומ"ץ וויען ב"פ, הרה"ג ר' יחיאל מיכל דאסקאל שליט"א ראש ישיבת צמח צדיק וויזניץ ב"פ, אב"ד גלאגוב, אב"ד רודניק, הגה"צ ר' יחיאל מיכל שטיינמעטץ שליט"א דומ"ץ סקווירא ב"פ, און הרה"ג ר' נחום מאיר גערמאן שליט"א ר"ם מתיבתא ד'באבוב, אב"ד סאדאוונא, אב"ד ראצפערט, אב"ד אור חיים, הרה"ג ר' לייבל וויליגער, און הרה"ג ר' ישראל ארנסטר.
אזוי אויך האבן זיך באטייליגט ביי די לוויה פילע בחורי ישיבות הקדושות אין תלמודי תורה פון בארא פארק, וועלכע זענען ארויסגעקומען בפקודת הקודש אפגעבן דעם כבוד האחרון פארן זקן רבני העיר, ישיבות הקדושות און די עלטערע קינדער פון די סקווירא מוסדות, מוסדות באבוב, מוסדות ראחמיסטריווקא, מוסדות וויזניץ, און ישיבת סערדאהעלי.
יעצט נאכמיטאג ארום האלב נאך פינף, וועט די ארון הקודש זיך הייבן מיט א פליגער אויפן וועג קיין ארץ ישראל, וואו דער משגיח וועט קומען למנוחת עולמים עדי יעמוד לתחיה.
