אלפי ישראל האבן זיך היינט נאכמיטאג פארזאמלט ברחובות העיר ירושלים אפצוגעבן דעם כבוד האחרון פארן שריד לדור דעה, זקן רבני אמעריקע, כ"ק מרן המשגיח הגה"צ רבי משה וואלפסאן זצ"ל אבד"ק אמונת ישראל, ביי די גרויסע לוויה וואס איז פארגעקומען בהיכל בית מדרשו של רבי, אין ביהמ"ד אמונת ישראל אויף רחוב אבן האזל בבנין מוסדות טשעכנוב אין ירושלים.
ארום איינס אזייגער מיטאג האט די פליגער געלאנדעט אין די לוד לופטפעלד, דארט האט אפגעווארט כ"ק אדמו"ר ממאחנובקא בעלזא שליט"א, וועלכער איז א תלמיד פונעם גרויסן נפטר זצ"ל פון ישיבת תורה ודעת, דער רבי שליט"א איז געגאנגען אנגעטון מיט בגדי שבת שטייענדיג אין די ימי המשתה פון א אייניקל, און ביום החופה פון נאך א אייניקל. דער רבי האט געזאגט קדיש און באגלייט א שטיק וועג.
נאך צוויי אזייגער נאכמיטאג איז די מיטה אנגעקומען קיין ירושלים צו רחוב אבן האזל, אויף א מסודר'דיגע פארנעם זענען געשטאנען שווערע טויזענטער אידן אויף די גאס און ארום, מען האט אריינגעפירט די מיטה אינעם היכל בית המדרש וואו עס האבן זיך געפונען הונדערטער אידן מיט פארוויינטע אויגן, צוערשט האט מען געזאגט פרקי תהלים, און דערנאך האט מספיד געווען בנו חביבו הרה"ג ר' אברהם יצחק וואלפסאן שליט"א אב"ד אמונת ישראל מאנסי.
אזוי אויך האט מספיד געווען כ"ק מרן פוסק הדור מרא דארעא קדישא שליט"א, און הרה"ג ר' יצחק האזענפעלד שליט"א רב דקהל אמונת ישראל ירושלים. דאן האבן די צוויי זיהן הרה"ג ר' אברהם יצחק און הרה"ג ר' צבי אלימלך שליט"א געריסן קריעה און געזאגט קדיש.
דערנאך האט דער פילקעפיגער ציבור ארויסבאגלייט די מיטה דורך די גאסן פון אבן האזל, עזרת תורה, און גבעת משה, ביז מען איז אנגעקומען פארנט פון ביהמ"ד הגדול ראחמיסטריווקא, וואו ידידו ורעו כ"ק אדמו"ר מתולדות אהרן שליט"א האט געזאגט קדיש, דערנאך האט מען אריינגעלייגט די מיטה אין א זק"א אמבולאנס, פארנדיג אויפן וועג קיין עיה"ק טבריה למנוחת עולמים.
צווישן די טויזענטער באגלייטער האבן זיך אנגעזעהן מערערע אדמורי"ם ורבנים, כ"ק האדמורי"ם מתולדות אברהם יצחק, תולדות אהרן, קארלין סטאלין, ביאלא, אמשינוב ארה"ב, מודזיץ, לוצק, זוטשקא ירושלים, באסטאן, מבקשי אמונה, קהל חסידי ירושלים, אונגוואר, סקולען ירושלים, גאב"ד ראדאמישלא, הגה"צ ר' יצחק מאיר מארגענשטערן שליט"א מתורת חכם, הגה"צ ר' צבי מאיר זילבערבערג שליט"א, הגה"צ ר' יצחק משה ערלאנגער שליט"א, הגה"צ גאב"ד זוועהיל, גאב"ד ביתר, אב"ד שערי טובי', אב"ד קאלוב ביתר, ראש ישיבת טשעבין, ראש ישיבת סלונים, און ראש ישיבת שומרי אמונים.
אזוי אויך האבן זיך באטייליגט פילע אברכי הכוללים ותלמידי ישיבות הקדושות, כ"ק אדמו"ר מתולדות אהרן שליט"א וועלכער איז געווען זייער נאנט מיטן גרויסן נפטר זצ"ל, האט געהייסן אלע חסידים זקנים עם נערים ארויסקומען אפצוגעבן דעם כבוד האחרון, און אזוי אויך די חסידים פון טבריה ביי די לוויה אין טבריה און די מעמד הקבורה.
