הונדערטער חסידים חברי קהילת אמונת ישראל האבן זיך נעכטן מיטגעפריידט ביי די געהויבענע שמחת החתונה במעון הקודש פונעם נייעם רב הגה"צ רבי שמואל יהודה זילבער שליט"א, ווען מיט רירנדע הרגשים האט מען מקבל געווען נשמת הקודש פונעם אומפארגעסליכן רעיא מהימנא דער רב פון אמונת ישראל זצ"ל ווייניגער ווי פיר און צוואנציג שעה זינט די הסתלקות לשמי מרום.
בראש השמחה האבן באשיינט די געהויבענע זיידעס און מחותנים, כ"ק אדמו"ר מתולדות יהודה סטוטשין שליט"א, כ"ק אדמו"ר מסערדאהעלי שליט"א, הגה"צ ר' הלל וויינבערגער שליט"א גאב"ד סערדאהעלי ודומ"ץ נייטרא, און הגה"צ ר' שלמה יעקב יאזעפאוויטש שליט"א אב"ד אהל תורה.
אלע חברי הקהילה פון אמונת ישראל זענען געקומען אנגעטון מיט בגדי שבת זיך מיטצופרייען ביי די געהויבענע שמחה ביים נייעם רב, און פאר לענגערע שעות האט מען זיך געוואונטשן במאור פנים און מיט רירנדע הרגשים. ביים קבלת פנים האט הרה"ג ר' דוד רוח שליט"א אויפגעטרעטן מיט גראמען, און דערמאנט די גרויסע זכותים פונעם עלטער זיידן וואס קומט אצינד אראפ מגנזי מרומים זיך מיטצופרייען ביי די שמחה, ארומרעדנדיג איבער די תוכן פונעם הספד וואס דער זיידע כ"ק אדמו"ר מתולדות יהודה סטוטשין שליט"א האט געזאגט מיט עטליכע שעה פריער.
ביים מעמד החופה איז דער זיידע כ"ק אדמו"ר מסערדאהעלי שליט"א מכובד געווארן מיט סידור קידושין, קריאת הכתובה דער זיידע כ"ק אדמו"ר מתולדות יהודה סטוטשין שליט"א, ברכות ראשונות דער זיידע הגה"צ אב"ד אהל תורה שליט"א, און ברכה אחריתא דער זיידע הגה"צ גאב"ד סערדאהעלי ודומ"ץ נייטרא שליט"א.
ביי די געהויבענע ריקודין האבן די זיידעס און מחותנים אריינגעלייגט א גרויסע עבודה, כ"ק אדמו"ר מתולדות יהודה סטוטשין שליט"א האט זיך אויסגעדרוקט אז יעצט איז די רצון השם צו טאנצן, דארף מען טאנצן און נישט וויינען אויף די שווערע אבידה. פארן בענטשן האט כ"ק אדמו"ר מסערדאהעלי שליט"א געטאנצן מצוה טאנץ, און שפעטער האט מען ממשיך געווען מיט די ריקודין של מצוה פון די זיידעס און מחותנים האדמורי"ם והרבנים.
