הגה"צ ר' אברהם יצחק וואלפסאן שליט"א אב"ד אמונת ישראל איז אנגעקומען צוגאסט קיין ארץ ישראל, לקראת כלות השלושים צו די פטירה פון אביו הגדול הגה"צ המשגיח ר' משה וואלפסאן זצ"ל אב"ד אמונת ישראל, וואס געפאלט קומענדיגן מאנטאג ט"ז תמוז.
דעם קומענדיגן שבת קודש וועט דער רב שליט"א פראווענען א געהויבענע שבת אינאיינעם מיט תלמידיו חסידיו ומעריציו, יוצאי קהילה קדושה אמונת ישראל און די בחורי החסידות וועלכע לערנען אין ארץ ישראל'דיגע ישיבות. די שבת וועט געפראוועט ווערן אין ביהמ"ד דקהל אמונת ישראל אין ירושלים אין די בנין פון ישיבת טשעכנוב אויף רחוב אבן האזל.
זונטאג אויפדערנאכט וועט פארקומען די שלושים סעודה אין שפיץ פונעם רב שליט"א, אין די סקווירא זאל אויף רחוב יהודה המכבי ביים ווינקל פון רחוב רש"י, און מאנטאג נאכמיטאג וועט פארקומען די עלי' לציון אויפן בית החיים אין טבריה במעמד קהל רב.
