די הונדערטער תלמידים חסידים ומעריצים פון קהילה קדושה אמונת ישראל ברחבי ארץ הקודש, גרייטן זיך צו אנטפאנגען בכבוד הראוי דעם חשובן גאסט וואס קומט צו פארן פון אמעריקע, כ"ק הגה"צ רבי שמואל יהודה זילבער שליט"א אבד"ק אמונת ישראל, נכדו חביבו וממלא מקומו פונעם מייסד הקהילה כ"ק הגה"צ רבי משה וואלפסאן זצ"ל אבד"ק אמונת ישראל, פון וועמענס הסתלקות מען שטייט נאך אצינד אין די שנת האבילות.
אין ארץ ישראל איז פארהאן צוויי גרויסע קהילות אינערהאלב די קהילה קדושה אמונת ישראל, די בית המדרש אין ירושלים עיר הקודש, און די בית המדרש אין שטאט ביתר, וואס ווערט געפירט דורכ'ן דיין הקהילה הרה"ג ר' שמואל דוד הארדט שליט"א. אצינד גרייט מען זיך צום געהויבענעם נסיעה, ווען דער רב שליט"א וועט אנקומען קיין ארץ ישראל און פראווענען צוויי לעכטיגע שבתים אנהייב פון די ימי השובבי"ם.
דער רב שליט"א קומט אן קיין ארץ ישראל מארגן דאנערשטאג פרשת שמות, דעם קומענדיגן שבת פרשת שמות וועט געפראוועט ווערן בתוככי ירושלים עיר הקודש, די תפילות אין ביהמ"ד דקהל אמונת ישראל, און די לעכטיגע טישן סיי פרייטאג צונאכטס און סיי שלש סעודות, וועט געפראוועט ווערן אויף א גרויסע פארנעם אין ביהמ"ד הגדול וויזניץ אויף רחוב אדוניהו הכהן. די נאכפאלגענדע שבת פרשת וארא, די צווייטע שבת פון די ימי השובבי"ם, וועט געפראוועט ווערן בקרב קהילה קדושה אמונת ישראל אין שטאט ביתר עילית.
אין די זעלבע צייט איז געמאלדן געווארן אז דעם קומענדיגן שבת פרשת משפטים, די לעצטע וואך פון די ימי השובבי"ם, וועט דער רב שליט"א פראווענען א ערשטמאליגע שבת בקרב עדת צאן מרעיתו די בני הקהילה אין שטאט לעיקוואד, וואו עס איז גאנץ לעצטנס פארענדיגט געווארן די בוי ארבעט פאר די נייע פראכטפולע בית המדרש דקהל אמונת ישראל.
