דאס יהדות החרדית אין אמעריקע גרייט זיך צו אנטפאנגען בכבוד הראוי דעם חשובן גאסט פון ארץ ישראל, כ"ק אדמו"ר מבוהוש שליט"א וועלכער פירט אן זיין שיינעם הויף אין בני ברק, וועלכער נעמט אונטער דעם לאנגן נסיעה פון עטליכע וואכן צו אויפטרייבן גרויסע געלטער למען החזקת מוסדותיו הקדושים, איבערהויפט מיט די ברייט פארצווייגטע פראיעקט צו מרחיב זיין די גבולי הקדושה, מיטן צובויען עטליכע שטאק צום בנין הישיבה דחסידי בוהוש.
דער רבי שליט"א איז ערווארטעט צו לאנדן בשערי ניו יארק מארגן דינסטאג פרשת יתרו, און וועט באלד אריינפארן קיין וויליאמסבורג לבית האכסניא ביי הנגיד החסיד ר' יעקב יוחנן מענדלאוויטש הי"ו, דינסטאג נאכט וועט פארקומען א מעמד קבלת פנים בבית האכסניא, און דורכאויס די וואך וועט דער רבי אויפנעמען דעם ציבור חסידים לעצה ולברכה.
אויף שבת קודש פרשת יתרו וועט דער רבי ארויספארן קיין מאנסי, און פראווענען דעם שבת אויף א פריוואטע פארנעם, אין שטוב פון הנגיד החסיד ר' בנימין ווייזער הי"ו. נאך שבת וועט דער רבי אנקומען קיין קרית יואל און זיך דארט אויפהאלטן פאר עטליכע טעג, בבית האכסניא אין שטוב פון הנגיד החסיד ר' שאול פערלמוטער הי"ו.
שבת קודש פרשת משפטים שבת שקלים וועט דער רבי פראווענען א גרויסע שבת במקהלות פילע חסידים ואנשי מעשה, אינעם עיר ואם בישראל וויליאמסבורג, די תפילות און טישן וועלן פארקומען אין די עידן פאלאס זאל, וואו עס איז ערווארטעט א גרויסן ציבור חסידים און געסט פון אנדערע שטעט. דער רבי וועט פארבלייבן אין ניו יארק ביז אנהייב חודש אדר, און ארויפגיין לבתי נגידים ושועים אפצונעמען נדבת לבם פאר די קרן הבנין פון די ישיבה, שבת פרשת תרומה וועט דער רבי זיין אויף א פריוואטע פארנעם בגלילות קרית יואל.
