כ"ק אדמו"ר מבית יצחק ספינקא שליט"א וועט זיך די וואך ארויסלאזן אויף א מסע הקודש קיין לאנדאן עיר הבירה, צו באשיינען די שמחת החתונה פון א אייניקל וואס קומט פאר דעם מיטוואך אין שטאט לאנדאן, די חתן א זון פונעם רבי'נס איידעם הגה"צ ר' אליעזר צבי הורוויץ שליט"א, זון פון הגה"צ אבד"ק סאטמאר מאנטשעסטער שליט"א, מיט די כלה א טאכטער פון הגה"צ ר' חיים יודא לייבוש באב"ד שליט"א ראש ישיבת תורת חסד אין לאנדאן.
מארגן מאנטאג וועט דער רבי פארלאזן ביתו נאוה קודש אין וויליאמסבורג אויפן וועג קיין לאנדאן, דינסטאג צופרי וועט דער רבי אנקומען אין לאנדאן און האבן די אכסניא בבית הרה"ג ר' ישכר בעריש הערשבערג שליט"א, וואו דער רבי וועט זיך אויפהאלטן ביז קומענדיגע וואך מיטוואך פרשת וישב. אין לויף פון די באזוך וועט דער רבי אפשטאטן באזוכן בבתי אדמורי"ם ורבנים אין שטאט, און אויפנעמען קהל חסידיו לרגל די שמחת החתונה במעון קדשו.
דינסטאג אויפדערנאכט וועט פארקומען די סעודת עניים לכבוד די שמחה כנהוג, אין זאל פון ביהמ"ד חרדים אין די סטעמפארד הילל געגנט אין לאנדאן, מיטוואך אויפדערנאכט וועט פארקומען די גרויסע חתונה אין די זאלן פון יסודי התורה במעמד קהל רב. דאנערשטאג נאכט ליל שישי וועט פארקומען די צענטראלע שבע ברכות צוגעשטעלט דורכ'ן רבי'ן, פאר די פילע חסידים און געסט פון נאנט און ווייט, די שבע ברכות וועט געפראוועט ווערן ברוב פאר והדר אין די זאל פון תלמוד תורה באבוב.
לויטן יעצטיגן פלאן וועט דער רבי פראווענען שבת אויף א פארמאכטע פארנעם, און מיטהאלטן די שמחת השבע ברכות במעון קדשו וואס וועט פארקומען דורכ'ן מחותן הגה"צ ראש ישיבת תורת חסד שליט"א.
פארגאנגענעם דאנערשטאג איז דער רבי ארויסגעפארן בראש קהל חסידיו צו מתפלל זיין ביים ציון הק' פון אביו הגדול הרה"ק מספינקא זי"ע אויפן בית החיים אין ניו דזשערזי, להיפקד בדבר ישועה ורחמים. אזוי אויך איז דער רבי ארויסגעפארן קיין קרית יואל צו מתפלל זיין ביים ציון הק' פון הרה"ק מסאטמאר זי"ע לקראת די שמחה, און באזוכט ביי כ"ק אדמו"ר מסאטמאר שליט"א אפצונעמען ברכת הקודש לכבוד די שמחה.
