כ"ק אדמו"ר מאלכסנדר שליט"א איז ערווארטעט אנצוקומען אויף א געהויבענע באזוך אין ניו יארק מחזק צו זיין קהל חסידיו ומעריציו, דער רבי קומט צו פארן מארגן מיטוואך און וועט צוערשט אנקומען קיין מאנסי, לבית האכסניא אין שטוב פון הנגיד ר' שלמה זלמן שאהן הי"ו אויף מעיפל טערעס.
מיטוואך נאכט וועט פארקומען א מעמד קבלת פנים לכבודו פונעם רבי'ן בבית האכסניא, מיט די באטייליגונג פון פילע רבני העיר ואנשים חשובים, מען וועט האבן די זכיה צו הערן דברות קודש פון רבי'ן און אריבערגיין שלום נעמען ביים גרויסן גאסט.
דעם קומענדיגן שבת קודש פרשת שלח וועט דער רבי פראווענען אויף א געהויבענע פארנעם אין שטאט בארא פארק, וואו עס איז פארהאן א שיינע קיבוץ חסידי אלכסנדר, וועלכע האלטן אצינד אין די לעצטע פאזעס צו פארענדיגן די בוי ארבעט ביים נייעם בנין ביהמ"ד הגדול דחסידי אלכסנדר, אין שפיץ פונעם רב הקהילה הגה"צ ר' יוסף ארנסטר שליט"א.
די גרויסע בנין פון מתיבתא עץ חיים ד'באבוב איז ספעציעל ארויסגעדינגען געווארן פאר די תפילות און טישן דורכאויס שבת, צו קענען אקאמאדירן די הונדערטער חסידים וואס זענען ערווארטעט מיטצוהאלטן דעם שבת קודש בצילא דמהימנותא, דער רבי וועט האבן די אכסניא אין שטוב פון מקורבו הנגיד החסיד ר' יעקב צבי גוטמאן הי"ו, און וועט פארבלייבן אין ניו יארק איז דעם קומענדיגן דאנערשטאג פרשת קרח.
