דאס יהדות מאנטריאל האט נעכטן דינסטאג מיטגעלעבט היסטאריע, ביים גרויסארטיגן עצרת מחאה וואס איז פארגעקומען פארנט פון די ציוניסטישע קאנסולאט אין קוויבעק קאנאדע, שאפנדיג א געוואלדיגע קידוש השם קבל תבל ומלואה, וואו מען האט אויסגעשריגן דעם שרעקליכן ווייטאג פון אידישע קינדער, איבער די שרעקליכע רדיפת הדת בארצינו הקדושה.
די עצרת מחאה האט זיך אנגעהויבן מיט א פאראייניגטע מארש ווען טויזענטער אידן האבן מארשירט אינאיינעם לענגאויס עטליכע הויפט גאסן וואס איז געווען פארנומען מיטן אלגעמיינעם באפעלקערונג, ווען דערביי האט מען אויסגעשריגן פארשידענע מעסעדזשעס אין שאנדע פון די ציוניסטישע רעגירונג און זייער מיליטער, באגלייט מיט ספעציעלע טרעקלעך וואס האט אויפגעשפילט א סצענע פון בחורי חמד זיצן אין טורמע פארן זינד פון לערנען תורה.
אנקומענדיג פארנט פון די קאנסולאט צום באשטימטן ארט, האבן זיך פארזאמלט טויזענטער אידן, און ווי די פאליציי האט געשאצט איז געווען פארזאמלט אויפן ארט אריבער דריי טויזענט אידן, א רעקארד הויכע ציפער פארן מאנטריאל'ן אידנטום, אויפן בימת הכבוד האבן זיך אנגעזעהן די גדולי רבני העיר, אלע רבני ודייני קהילות סאטמאר, רבני ודייני ק"ק סקווירא, רבני ודייני ק"ק טאהש, הגה"צ אבד"ק דזיבוי שליט"א, הגה"צ ר' לייבוש האגער שליט"א בנו בכורו פון כ"ק אדמו"ר מוויזניץ שליט"א פון מאנטריאל און נאך פיל.
דער יושב ראש הרב יודל שטערן שליט"א האט אויסגערופן הגה"צ גאב"ד סאטמאר מאנטריאל שליט"א וועלכער האט אויפגעטרעטן מיט א פייערדיגע דרשה, דערנאך האט גערעדט הרה"ג ר' יואל צבי מאשקאוויטש שליט"א דומ"ץ קרית טאהש, און הרה"ג ר' אהרן יוסף לייטנער שליט"א ר"ם בישיבת תורת משה סאטמאר מאנטריאל.
הרבני החסיד ר' שרגא פייוויל ברעכער הי"ו חבר הנהלת קהל יטב לב ד'סאטמאר האט אויפגעטרעטן פאר די פרעסע אויף די פראנצויזישע שפראך, און אויף די ענגלישע שפראך האט אויפגעטרעטן הרב החסיד ר' יעקב נפתלי מאשער הי"ו מרביץ תורה אין מאנטריאל.
דערנאך האט מען געזאגט קבלת עול מלכות שמים, פארגעזאגט דורך הגה"צ רבי יוחנן וואזנער שליט"א ראב"ד סקווירא, און דער ציבור איז זיך צוגעגאנגען נאכן שאפן א מאכטפולע קול מחאה און קידוש השם איבער די גאנצע וועלט.
