היי יאר צום ערשטן חנוכה ליכטל זונטאג ביינאכט ליל א' דחנוכה, איז כ"ק אדמו"ר מאנטוניא שליט"א צום ערשטן מאל אריינגעקומען בבית מדרשו אנגעטון מיט א קאלפיק, גייענדיג אין די פוסטריט פון די פריערדיגע צדיקים לבית וויזניץ, וואו מען איז זיך נוהג צו גיין מיט א קאלפיק ביים צינדן די חנוכה ליכט.
צוויי און דרייסיג יאר איז שוין אריבער זינט כ"ק אדמו"ר מאנטוניא שליט"א איז אויפגענומען געווארן אלס ממשיך השלשלת, נאכן הסתלקות פון זיין פאטער כ"ק אדמו"ר מאנטוניא זצ"ל, זייענדיג אן אייניקל פון די הייליגע צדיקים לבית וויזניץ. טראץ וואס דער מנהג אין וויזניץ איז צו גיין מיט א קאלפיק ביי חנוכה ליכט און ביי פארשידענע מעמדים דורכאויס די יאר, האט דער אנטוניא רבי אבער נאך קיינמאל נישט אנגעטון א קאלפיק.
דאס יאר איז דער רבי נעתר געווארן צו די בקשה פון די בני המשפחה און די חסידים, און דער רבי איז צום ערשטן מאל אריינגעקומען מיט א קאלפיק צו צינדן די חנוכה ליכט, בעפאר די יארצייט טיש לרגל די הילולא קדישא פון זקינו הרה"ק רבי חיים מאנטוניא זי"ע, זון פון הרה"ק בעל אמרי ברוך מוויזניץ זי"ע.
